Од Автомотосојузот на Македонија информираат дека сообраќајот на државните патишта се одвива непречено, по наместа влажни коловози. Слаби врнежи од дожд има само во југозападниот дел од земјата. Поради појава на магла, видливоста во Крушево е намалена на 30 – 50 метри.

Поради изведување на градежни активности, односно минирање на патниот правец А2 Кичево – Охрид, денеска на делницата Пресека – Песочан, кај с. Врбјани, ќе има привремени прекини на сообраќајот од 15 до 20 минути, во периодот од 12:00 до 15:00 часот, додаваат од АМСМ.

Интензитетот на сообраќај на патните правци надвор од градските средини е умерен. На граничните премини, од македонска страна, нема подолги задржувања за влез и за излез од државата.

Сојузот на здруженија на пензионери апелира приоритет при вакцинирањето против Ковид-19 да имаат пензионерите.

„Во име на над 300 000 возрасни луѓе во нашата земја алелираме пензионерите да имаат приоритет за вакцина против КОВИД 19, како што е во сите земји во опкружувањето и пошироко во целиот свет“, порачаа од Сојузот преку соопштение.

Од Сојузот аргументираат дека пензионерите се најранлива категорија бидејќи голем број од нив се со хронични болести и намален имунитет.

Управата за хидрометеоролошки работи најави дождови на крајот на седмицата кои ќе бидат наместа поројни.

„Под влијание на циклонска активност во Медитеранот и влажна воздушна маса, в недела кон крајот на денот и в понеделник врнежите ќе бидат пообилни, а на места и поројни (над 35 л/м2)“, информираат од УХМР.

В понеделник на планините ќе вее снег.