Националниот Совет на жени на Македонија СОЖМ смета дека позицијата на жените во Македонија не е многу лоша, но сеуште има многу да направи за подобрување во оваа насока.

Националниот Совет на жени на Македонија СОЖМ смета дека позицијата на жените  во  Македонија не е многу лоша, но сеуште има многу да направи за подобрување во оваа насока.

НСЖМ-СОЖМ на денешната прес конференција го критикуваа фактот дека во Македонија нема жени градоначалнички и дека според податоците во државата жените во просек земаат една третина пониска плата од мажите.

НСЖМ-СОЖМ најмногу ja критикува состојбата што жените во руралните средини живеат во крајно незавидна позиција и дека се целосно маргинализирани, а како пример тие го посочуваат фактот дека само два отсто од жените во руралните општини поседуваат сопствен имот, па со тоа и не можат да аплицираат за субвенции од владата. Според НСЖМ-СОЖМ во руралните средини нема ниту градинки ниту гинеколошки амбуланти.

„Проблемите кои ги наведовме не се проблеми само на жената, туку тоа се родови проблеми, проблеми со кои се соочува целото семејство“, велат од НСЖМ-СОЖМ.

НСЖМ-СОЖМ соопшти дека организирале делегација за присуство на 54тата Сесија на Комитетот за статусот на жената  во Обединетите Нации која се одржа од 1ви до 12ти март во Њујорк.

Делегацијата од 22 учесници од НВО, бизнис секторот, здравството, локалната самоуправа и естрадата, заедно со околу 8000 невладини организации и владини делегации присуствуваше на сите работилници и панели на сесијата, соопшти Ирина Костовска, член на НСЖМ-СОЖМ.

Костовска рече дека на Сесијата на Комитетот за статусот на жената се  разгледувало постигнувањето од имплементирањето на Пекинг Платформата за Акција и се разменувале досегашните искуства помеѓу учесниците од целиот свет.

Генералниот секретар на ОН Бан Ки Мун на сесијата ги посочил родовата еднаквост и јакнењето на жената како главен приоритет во наредните пет години, додавајќи дека жените се клуч за економскиот развој, мирот и сигурноста.

Во заклучокот од сесијата на Комисијата за статусот на жената стои дека е потребен целосен и сеопфатен пристап за подобрување на позицијата на жената во општеството, но и дека е потребна е успешна соработка помеѓу сите актери за успешно имплементирање на Пекинг Платформата за акција, како и административни реформи за да и се даде право на жената на еднаков пристап до сите ресурси, рече Сања Јовановска, член на НСЖМ-СОЖМ.

На денешната прес конференција НСЖМ-СОЖМ  ја критикуваше македонската Мисија во ОН бидејќи иако биле известени, тие воопшто не присуствувале на сесијата.

НСЖМ-СОЖМ најавија дека денеска испратиле писмо до Министерот за труд и социјална политика Џелал Бајрами со реакција и понуда за понатамошна соработка и дека ги понудиле своите ресурси, човечки знаења и методи да им помогнат на центрите за социјална работа и на сите надлежни институции за подобрување на статусот на жената во државата./крај/иа