Премиерот Христијан Мицкоски одговарајќи на пратеничко прашање во врска со извештајот на Европската комисија за напредокот на државата и во однос на преземените чекори кон евроинтеграциите, ги потенцираше специфичните условувања кон Македонија, билатерализацијата на патот кон членство во Унијата, се наврати на однесувањето на минатите влади и неколкупати прифатените условувања вон Копенхашките критериуми, но и посочи на конкретни преземени мерки во овој период наведени во извештајот на ЕК. Притоа напомена дека ваквиот однос и оценување од страна на ЕК во извештајот не треба да биде причина за евроскептицизам, ниту пак да биде модел за исполнување на сè што е ставено на маса, а притоа да се нема гаранции дека друго, освен зацртаните критериуми нема да го попречат патот.

„Не треба да имаме дилема ниеден во Собранието дека иднината на Македонија е во рамките на ЕУ. Се разбира дека пристапот до реализирање на таа цел е поинаков. Претходната влада имаше пристап дека со тоа што ќе потпишуваат и прифаќаат сè што ќе им е ставено на маса ќе им бидат простени криминалот и корупцијата и сето она што беше заштитен знак за нивната влада и дека ако стават потпис на секој од документите на маса, некој од таму на магичен начин ќе ги остави на власт и ќе продолжат сложно да ги крадат граѓаните и државата.

Заедничка цел на сите нас е да бидеме дел од ЕУ. За тоа треба да ги завршиме преговорите, но пред да ги завршиме треба да ги започнеме. Многу пати до сега високи функционери на претходната влада, почнувајќи од претходните премиери, ни ја кажуваа невистината, дека сме ги почнале преговорите, дека преговараме, дека имаат добра вест, проследени со објавувани селфи-фотографии од авиончиња, од бротчиња, од понекоја јахта од Егејското Море итн. како еве патуваме кон Европа, возот е незапирлив само што не сме стигнале, а во суштина се наоѓаме на истото место каде што бевме за жал пред 25 години. На самиот почеток. И ние сме единствениот случај, во којшто не можеме да напредуваме, затоа што имаме активна блокада, активно вето, поради билатерални прашања. Прво тоа беше спорот со нашиот јужен сосед, спорот за името на државата, па на начин на којшто сите бевме сведоци се случи таа промена. А сега е повторно нова измена на Уставот, којашто претходната Влада го суспендираше Парламентот и прифати нешто коешто не успеа да го испорача. И сега е дел од заклучоците на Европскиот совет дека ние треба тоа да го направиме, без притоа да имаме јасна гаранција и предвидливост дека и тоа да се направи, дека ние ако ги завршиме преговорите и сето тоа што треба да го завршиме, бидеме дел од ЕУ, и дека нема да има дополнителни блокади поради билатерални прашања. Влегоа во таа авантура, реков кој беше мотивот на претходната Влада“, посочи Мицкоски.

Тоа, како што додаде, не е начин на размислување на оваа влада.

„Сè ќе сториме во наша моќ за да стигнеме и да ја реализираме таа стратешка цел, но мора тоа да биде без двојни стандарди, да биде согласно Копенхашките критериуми и мора да имаме двонасочна улица. Не може улицата да биде еднонасочна, бидејќи за името на европската цел и за името на европските интеграции граѓаните на Македонија направија многу отстапки во минатото, ако тргнеме од промената на банкнотите, преку промената на знамето, потоа промената на името, Уставот неколку пати“, дециден е Мицкоски.

Претседателката Гордана Сиљановска-Давкова ќе престојува во работна посета на Црна Гора, по повод учеството на Балканскиот форум за интеграција 2025 којшто ќе се одржи во Подгорица во организација на Европското движење во Црна Гора и Министерството за надворешни работи и меѓународна соработка на Италија.

Сиљановска-Давкова ќе се обрати на сесијата насловена „Претседателите за ЕУ интеграциите – Имаме ли план?“ и ќе оствари билатерална средба со претседателот на Црна Гора, Јаков Милатовиќ.

Во фокусот на Балканскиот форум за интеграција се геополитичките предизвици во светот, ЕУ и регионот на Западен Балкан, како и клучните области во евроинтегративниот процес: основните човекови слободи и права, владеењето на правото, доброто управување, безбедноста, борбата против корупцијата и организираниот криминал.

Покрај државни функционери од регионот, на Форумот ќе учествуваат истакнати експерти за европски интеграции и претставници од бизнис-секторот.

Министерот за правда Игор Филков говорејќи за Извештајот на ЕК за напредокот на државата на прашањето упатено од пратеничката Дијана Тоска од Европски фронт рече дека Министерството за правда во изминатите месеци има подготвено повеќе од 20 закони.

,, Пред да се навратиме на прашањето би сакал да ја потсетам целокупната јавност дека кога говориме за реформскиот процес тоа е нешто што претходната Влада го прифати без разговарање за датумите во последната година од својот мандат затоа што знаеше, односно мислеше дека откако ќе ги изгуби изборите никој нема да успее за толку кратко време да ги донесе сите суштински реформи и државата да ја придвижи напред.

Да говориме со факти и со бројки. Законот за судски совет ја помина владината процедура.

Во владина процедура се: – Закон за платите на судиите. Трагично е што дискусијата ја сведувате само на пари, оние исти пари кои што пред некој ден од нашите стратешки партнери, оние огромни суми од половина милијарда долари кои што се вложени во судство а вие ништо не направивте додека бевте на власт.

-Закон за платите на јавните обвинители

-Закон за платите на членовите на Судски совет на Република Северна Македонија

-Закон за платите на членовите на Советот на јавните обвинители на Република Северна Македонија

-Законот за судска служба

-Законот за јавнообвинителска служба”, потенцира Филков.

Тој информираше дека во финална фаза се Законот за јавно обвинителство, Законот за Советот на јавни обвинители, Кривичен законик, Закон за кривична постапка, Закон за судски буџет, Закон за судови, Закон за Академија за судии и јавни обвинители.

,,Бидејќи наследивме хаос и ова не беа единствените закони кои требаше да ги адресираме во изминатите месеци, МП низ отворен и транспарентен процес работеше и на следните закони.

Во владина процедура се: Закон за спречување на корупција и судир на интереси, Закон за заштитено пријавување и заштита на укажувачи, Закон за парнична постапка, Закон за вештачење, Закон за процена, Закон за слободен пристап до информации од јавен карактер.

Во финална фаза на подготовка се: Закон за заштита на лични податоци, Закон за пробација, Закон за извршување на санкции, Закон за помилување, Закон за здруженија и фондации”,истакна Филков.