Со изложбата на фотографии посветена на браќата Милтон и Јанаки Манаки во Музејот на Нормандија во Каен, Долна Нормандија вечерва официјално ќе биде отворено шестото издание на манифестацијата „Балканска пролет“.

Со изложбата на фотографии посветена на браќата Милтон и Јанаки Манаки во Музејот на Нормандија во Каен, Долна Нормандија вечерва официјално ќе биде отворено шестото издание на манифестацијата „Балканска пролет“,.

Оваа година изданието е посветено на македонската култура.

Како што информираат од министерството за култура програмата на манифестацијата претставува синтеза на различни делови од богатата македонска култура и е конципирана како спој на традиционалното творештво на Република Македонија и на урбаната македонска култура.

Македонската традиционална музика ќе биде претставена преку изведбите на групата „Љубојна“, етно-составот „Баклава“ и на Стефче Стојковски со триото „Гавроски“. Предвидени се и настапи на Женскиот младински хор при Младинскиот културен центар предводен од диригентот Сашо Татарчевски, како и концерт на „Проект жлуст“.

Македонската етнолошка традиција ќе биде презентирана преку изложбите на фотографии посветени на Јуруците во Македонија, во организација на Македонскиот центар за фотографија, и на народни носии и накит од Македонија, во организација на Заводот и музеј од Битола.

Предвидено е и претставување на фотографии на режисерот Милчо Манчевски.На манифестацијата ќе бидат организирани и литературни средби на македонските еминентни писатели, односно поети: Луан Старова, Данило Коцевски и Никола Маџиров со нивни колеги од Нормандија и од другите балкански земји кои веќе биле претставени на претходните изданија на „Балканска пролет“. Во Долна Нормандија, исто така, ќе биде прикажан и филмот на Теона Митевска „Како убив светец“.

Организатор на манифестацијата е асоцијацијата „Балкан транзит“ од Долна Нормандија, а досега биле претставени културите на Босна и Херцеговина, Албанија, Грција, Бугарија и на Романија./крај/со/бд