Започна македонското претседавање во Советот на Европа. Министерот Антонио Милошоски симболично го доби клучот кој му го врачи досегашниот претседавач, Швајцарија

Започна македонското претседавање во Советот на Европа. Министерот Антонио  Милошоски симболично го доби клучот кој му го врачи досегашниот претседавач, Швајцарија и со тој чин во наредните шест месеци, Македонија ќе ги форсира приоритетите кои се доставени до сите земји членки на Советот на Европа.

Со самото примопредавање, веќе на почетокот на говорот на министерот Милошоски , во кој  рече  дека му е чест да ги претстави македонските приоритети, грчкиот заменик министер, Димитрис Друцас  веднаш побара реплика .

Тој  на двапати побара од претседавачот Милошоски да се придржува кон практиката за употреба на привремената референца, општо прифатена од меѓународните институции и да не ја злоупотребува и манипулира позицијата.

Министерот Милошоски на ова реплицира, дека, тој воопшто не ја злоупотребува придавката македонски, не го манипулира или  монополизира тој термин како што посочи Друцас, туку дека тоа е основно индивидуално човеково право.

„Како што вие сте Грк, Карл Билд Швеѓанец, јас сум Македонец и тоа е основното човеково право, а овој Совет е куќа на човековите права“ истакна Милошоски.

По состанокот грчкиот портпарол и покрај реакцијата на неговиот министер, побрза да ја покаже љубезноста и да посочи дека Грција стои зад својата определба,  за поддршка  и вклучување на Македонија  во Европската унија.

Министерот Милошоски, рече дека ова е историски ден за Македонија, дека нашето претседателствување има и што да понуди и што да покаже, да даде поголем придонес за реформите во Советот на Европа.

Министерот подвлече дека СЕ, се наоѓа на крстопат и треба да реши дали ќе остане еден бирократски диносаурус со мала релевантност или  ќе се залага за владеење на правото и на почитување на човековите права на  800 милиони Европејци и релевантно видлива европска организација.

„Ќе ги следиме стандардите, ќе ги форсираме веќе познатите  приоритети и ќе  бидеме присутни  секаде каде што функционира СЕ, особено во Албанија, Молдавија и Босна и Херцеговина. Се надевам дека, по се ова Македонија  по шестмесечното претседателство ќе биде поискусна и дипломатски попрепознатлива држава во светот“ рече Милошоски. /крај/да