Обединетите нации мора да останат централен медиум за решавање на спорот со името, а одговорноста лежи кај лидерите од двете земји, смета американскиот заменик-помошник државен секретар Стујарт Џонс.

Обединетите нации мора да останат централен медиум за решавање на спорот со името, а одговорноста лежи кај лидерите од двете земји, смета американскиот заменик-помошник државен секретар Стујарт Џонс. Оваа изјава на Џонс, од Конференцијата за трансформација на Балканот, што се одржа во Вашингтон ја пренесува Гласот на Америка на македонски јазик (ВОА).

Стручњаци и дипломати на конференција во Центарот за стратешки и меѓународни истражувања во Вашингтон, дебатираа на тема  „Трансформирање на Балканот: безбедност, политичка стабилност и економски развој“, пренесува ВОА .

На настанот што првенствено се занимаваше со грчко-американската соработка на Балканот, амбасадорот на Грција во САД Василис Каскарелис истакна дека земјата е сојузник на кој Вашингтон може да му верува.

Грција, според Каскарелис, и натаму ќе ја држи вратата за членство во ЕУ отворена за сите земји од Балканот.

Проблемот со името, пренесува ВОА, беше споменат во контекст на негово брзо решавање, поради потребата од поширока регионална безбедност. На конференцијата беше поставено и прашање за поголема ангажираност на САД, со оглед дека нема видливи резултати од досегашните преговори во рамките на ОН.

„ОН мора да останат централен медиум за процесот. На тоа се обврзаа двете страни, како и САД и ЕУ. Секако дека има многу дискусија надвор од процесот во рамки на ОН со цел да се помрднат работите, но никој нема поголемо влијание во процесот од грчката и македонската влада.  Одговорноста за пронаоѓање решение лежи кај лидерите од двете земји“, рече американскиот заменик-помошник државен секретар Стујарт Џонс.

Тој, според ВОА, смета дека посредникот на ОН, Метју Нимиц одлично си ја врши работата и се надева дека решение ќе биде најдено летово.  На последната средба со грчкиот премиер Јоргос Папандреу во Белата куќа, претседателот Обама му порачал дека прашањето со името мора да се реши во следните месеци, рече Џонс.

Грчкиот амбасадор Каскарелис мисли дека е лоша идеја да се помести тежиштето на преговорите надвор од ОН, затоа што Светската организација овозможува специфична рамка на прифатени принципи од сите земји, пренесува ВОА.

„САД секако можат да помогнат во процесот, ние бараме помош од нив – да помогнат со идеи, дискусии, да ја анализираат ситуацијата, но јас верувам дека би било лошо прашањето да се тргне од надлежност на ОН“, рече Каскарелис./крај/воа/см