Планината Осогово е планина која најверојатно е под најголем притисок и е најексплоатирана од човекот во Македонија, велат од Македонското еколошко друштво.

Планината Осогово е планина која најверојатно е под најголем притисок и е најексплоатирана од човекот во Македонија, велат од Македонското еколошко друштво. Од ова друштво, како дел од проектот „Осоговските планини во балканскиот зелен појас“, веќе две години се собираат податоци за идентификација на значајните делови на Осоговските планини и помош на локалните заедници, како и евентуално прогласување на оваа област за заштитено подрачје. „Ова што го работевме беше прибирање на податоци за да може конечно да се направи преглед со одредени граници и значајни зони, за да се презентираат сознанија од аспект на социо-економските параметри кои ќе ни помогнат во дефинирањето на позначајните делови,“ изјави Љупчо Меловски и изрази надеж дека овој проект ќе им помогне на институциите и локалните власти за да се помогне на животната средина на Осоговските планини. Според него, голем дел од активностите спроведувани од човекот на планината се нормални, дел се и корисни како на пример сточарењето, но голем дел се и многу штетни за животната средина. „Во таа област секој доаѓа со булдожер и гради пат, кога и како ќе му падне на памет, без да се почитуваат законските одредби за заштита на средината,“ истакна Меловски. Основните цели на проектот, кој се уште трае, се за да се истражи биолошката разновидност на Осоговските Планини, да се формираат природни заштитни зони и да се придонесе за развојот на еколошкиот туризам. Македонското еколошко друштво (МЕД) е формирано во 1972 година со мисија за обединување на еколозите од Македонија, развој на екологијата и поефикасно решавање на проблемите во животната средина. Да ја унапредува еколошката наука, науката за животната средина и биолошката разновидност и нивната заштита, како и да промовира еколошки оправдано користење на природните ресурси./крај/ко