Од СДСМ денеска го обвинија премиерот Никола Груевски дека е виновен за неисплатените плати и неплатени придонеси за пет години на 120 работници од Пивара Битола. Од ВМРО-ДПМНЕ велат дека тоа се дезинформации.

Од СДСМ денеска го обвинија премиерот Никола Груевски дека е виновен за неисплатените плати и неплатени придонеси за пет години на 120 работници од Пивара Битола. Од ВМРО-ДПМНЕ  велат дека тоа се дезинформации.

„Врз основа на Договор за продажба на акции на ден 29.02.2000 година, Република Македонија претставувана од тогашниот министер за финансии Никола Груевски во крајно сомнителна процедура му продава 75,62% од вкупниот акционерски капитал на Пивара Битола на лицето Ахмет Искендер од Швајцарија. Договорената продажна цена е 3.769 денар по акција или вкупно 1.620.000 евра“, рече Јани Макрадули од СДСМ на денешната прес-конференција.

Макрадули образложи дека потоа се зосновала хипотека врз недвижниот имот на Пивара Битола на фирмата Кенри ГМБХ од Швајцарија во која како што рече тој,  како содружник се јавува Ахмет Искендер.

Според него хипотеката требало да се заснова на име Република Македонија.

Потоа изјави Макрадули фирмата се продала на  МАРДИ ДОО од Радовиш за цена од 1,640 милион евра.

„Поради малверзациите направени во изминатите години, МАРДИ купува фирма без товари, а доверителите заради криминално заснованата хипотека немаат никаква можност да си ги намират побарувањата во висина од речиси 5 милиони евра. Меѓу нив најголем доверител е Министерството за финансии со 4,8 милиони евра“, рече Макрадули.

Според него продажбата на пиварата е финиш на како што рече штетниот договор кој го има потпишано Груевски.

„Груевски го премолчел неправилното засновање на заложно право-хипотека со кое Република Македонија е оштетена за скоро 5 милиони евра. Фактот дека хипотеката е воспоставена десетина дена по губењето на изборите во 2002 година за нас не е воопшто случајност“, изјави Макрадули.

Тој рече дека очекуваат надлежните органи да одговорат како државата ќе ги наплати побарувањата на Министерството за финансии, ПИОМ, Агенцијата за вработување и Царинската управа.

Од ВМРО-ДПМНЕ, велат дека СДСМ  во периодот од  2002 до 2006 година кога биле на власт добро го провериле овој случај , но не нашле никакво незаконско работење.

„Откако не успеа во тоа, денес со невистини СДСМ се обидуваат да ја дезинформираат јавноста. СДСМ за се што се случувало во минатото го обвинуваат Никола Груевски и ВМРО-ДПМНЕ, но тоа е со цел за да го затскријат своето катастрофално владеење со Македонија, секој криминал и злоупотреба кој го направија“, изјави портпаролот на ВМРО-ДПМНЕ, Александар Бичиклиски./крај/бд