Во Македонија помеѓу жените и мажите сеуште постојат неправедни разлики во економската и другите сфери, особено кај немнозинските и маргинализираните заедници, заклучија експертите на дебатата по повод затворањето на проектот „Родово буџетирање на локално ниво“.

Во Македонија помеѓу жените и мажите сеуште постојат неправедни разлики во економската и другите сфери, особено кај немнозинските и маргинализираните заедници, заклучија експертите на дебатата по повод затворањето на проектот „Родово буџетирање на локално ниво“. Дискутантите меѓу кои беа и министерот за труд и социјала, Џелал Бајрами, Симоне Филипини, Амбасадорка на Кралството Холандија, Асија Варбанова, менаџер на проектот УНИФЕМ, Сади Беџети, градоначалникот на Тетово, претставник на општината Битола, како и други експерти, разговараа за воведувањето на концептот и алатките за родово буџетирање на локално ниво и за потоа да се испитаат ефектите на конкретните програми и буџети врз мажите и жените. „Генерално доколку ја погледнеме Македонија, мислам дека е на добар пат работејќи со проблемите на еднаквоста на родот, но сеуште постојат разлики, особено кај немнозинските заедници и некои од маргинализирани заедници, во поглед на економскиот развој,“ рече Симоне Филипини, Амбасадорка на Кралството Холандија и додаде дека со вакви проблеми се соочуваат скоро сите земји низ светот. „Се забележуваат некои сектори каде традиционалните предрасуди одат против еманципацијата на жените и девојките, што води кон неправедни разлики во образованието и вклучувањето во општеството, како на пример кај ромските девојки кои споредени со ромските момчиња, секогаш се на пониско ниво во процентите и тоа може да биде анализирано преку користење на ваквите аналитички алатки на родово одговорно буџетирање,“ рече таа и додаде дека особено е критична ситуацијата во земјата со текстилните работнички за кои би требало да се најде итно решение за да им се подобри ситуацијата. Министерот за труд и социјала, Џелал Бајрами истакна дека со разните проекти кои се носат и спроведуваат, Македонија е на добар пат да ја постигне целта односно во многу блиска иднина да воспостави целосна еднаквост помеѓу мажите и жените. „Со овој проект треба да се направи анализа на буџетот и врз основа на таа анализа  да се подобрат наредните буџети за да се поправи односно да се постигне еднаквоста помеѓу мажите и жените,“ рече Бајрами. Проектот „Родово буџетирање на локално ниво“ е финансиран од страна на Амбасадата на Кралството Холандија во Скопје, а го спроведе УНИФЕМ. Општините Тетово и Битола беа двете пилот општини во Скопје вклучени во овој проект. Тие беа поддржани во процесот на идентификација на родовите приоритети, и нивното вклучување во нивните локални стратегии и буџети, како и подготовка на механизми за следење на спроведувањето од родова перспектива./крај/ко