Владата на Република Македонија да го реши спорот за името со Република Грција, да покаже дека државата има капацитет да изнаоѓа компромиси, јавно да се откаже од антиквизацијата и во знак на добра волја на Атина да и го подари споменикот на Александар Македонски.

Владата на Република Македонија да го реши спорот за името со Република Грција, да покаже дека државата има капацитет да изнаоѓа компромиси, јавно да се откаже од антиквизацијата и во знак на добра волја на Атина да и го подари споменикот на Александар Македонски. Ова е препораката упатена до Владата од денешната прес конференција за спорот со името во организација на НВО Инфоцентар и Младинскиот центар за европско образование на тема „Бриф за спорот со името: поранешни, безимени или…“ која има за цел да ја поддржи јавната дебата за тоа дали Македонија ќе остане поранешна, ќе биде безимена или сепак ќе постигне компромисно решение со Грција. Билјана Велкова од НВО Инфоцентарот вели дека иако навидум информации за спорот со името има многу, јавноста сè уште нема јасна слика за вистинскиот тек на преговорите и за вистинските позиции на Македонија во овие преговори, што се случува и дали навистина на повидок има некакво решение. „Дополнителна забуна предизвикува Владата, која нарачува збунувачки истражувања, во кои граѓаните се наведуваат да ја споредат важноста на македонскиот идентитет и името со евроинтеграциите и чиј претседател изјавува дека доколку Македонија добие предлог за име – Република Северна Македонија за целосна меѓународна употреба – единствено што може е да организира референдум на кој би гласал против овој предлог,“ сметаат од овие организации. „Влатко Ѓорчев во колумната за Шпиц цитираше дека не треба да си ја свиткаме кичмата. Значи наоѓањето на компромисно решение со Грција се гледа како на процес на виткање на кичма,“ рече Лидија Димова од Македонскиот центар за европско образование која додаде дека ова е еден од стравовите на ЕУ, бидејќи македонската страна не покажува дека разбира дека барањето компромис значи понекогаш и виткање кичма на сметка на нешто друго и дека има капацитет да решава поголеми проблеми во иднина. Од двете организации и препорачаа на Владата да бара од европските институции да се вклучат во популаризацијата и промоцијата на евентуалното ново решение./крај/ко