Македонија
Преглед на печат – Македонија

„Дневник“ – „ДУИ не сака да биде статист“, пишува дека министрите од редовите на ДУИ не се согласиле со намерата на премиерот Никола Груевски за отчет за работата на Владата во изминатите четири години, бидејќи тие биле на власт само две години.
„Дневник“
„ДУИ не сака да биде статист“, пишува дека министрите од редовите на ДУИ не се согласиле со намерата на премиерот Никола Груевски за отчет за работата на Владата во изминатите четири години, бидејќи тие биле на власт само две години. Весникот, повикувајќи се на партиски извори, тврди дека дошло до разидување меѓу двете партии, а повод била закажаната прес конференција за вчера, на која премиерот требало да даде отчет за сработеното. Несогласувањата се јавиле меѓу премиерот и вицепремиерот Абдулаќим Адеми. Од ВМРО-ДПМНЕ тврдат дека коалицијата со ДУИ функционира без проблеми.„Време“
Под наслов „Пописот темпирана бомба“, весникот на насловната страна донесува текст за претстојниот попис. Пописот е многу значаен за ДУИ, бидејќи од процентот на Албанците што ќе биде регистриран, зависи и примената на Бадентеровиот принцип. Пописот на населението треба да биде спроведен за седум месеци, но постои веројатност тој да биде одложен бидејќи ДУИ не сака попишувањето на населението да го спроведува Државниот завод за статистика, туку посебна комисија, а целиот процес да го надгледува меѓународната заедница.„Нова Македонија“
„Црвенковски:Национален консензус?За што?“, пишува за промената на позицијата на опозициската СДСМ кон власта во врска со спорот за името со Грција. Првично, лидерот на СДСМ изјави дека и дава безрезервна поддршка на Владата да го реши спорот за името со Грција, под услов да не се загрозува националниот идентитет, а сега Црвенковски не гледа потреба да има национален консензус. Тој се жали и дека нема контакти со премиерот и дека последниот телефонски разговор меѓу нив се случил во 2008. година, кога Груевски му го честитал изборот за претседател на СДСМ.„Утрински весник“
„Спласна еуфоријата за стари коли“, пишува дека македонските граѓани, по првичната еуфорија, повеќе не се заинтересирани за купување на половни автомобили. Весникот понатаму додава дека сега на плацевите во земјата има над 6.500 возила кои чекаат купувачи. Тоа значи дека се очекува пад на цените и на старите и на новите автомобили. Увозниците на половни автомобили инкасираа добар приход, додека од друга страна, автоимпортерите на нови возила тврдат дека ова им е најлошата година откако го започнале својот бизнис. Според нив, земјата се наполнила со стари крнтии, а последиците ќе се почувствуваат уште оваа зима.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.