Македонија
12 години затвор за Мијалков за масовно и нелегално прислушкување

Ексдиректорот на УБК Сашо Мијалков е осуден на 12 години затвор за масовното нелегално прислушкување од 2008 до 2015 година и уништување на системите за следење на комуникациите на МВР, заедно со опрема на телефонските оператори.
Ексминистерката за внатрешни работи Гордана Јанкулоска е осудена на четири години, откако судот пресуди дека таа ја спровела наредбата на Мијалков, формирала комисија и ја уништила опремата со која нелегално се прислушкувало. На тогашниот началник на Петтата управа на МВР, Горан Грујевски, кој заедно со Мијалков учествувал во прислушкувањето, му е досуден затвор во траење од 15 години. На Никола Бошкоски, кој исто така е во бегство, му е изречена 15-годишна затворска казна.
Тони Јакимовски, шеф на кабинетот на Мијалков во УБК, по чија наредба биле уништени системите за следење на комуникациите во МВР доби 6 години.
Обвинети дека формирале злосторничко здружување беа и Надица Николиќ, која доби три години. Владимир Варелов доби условна осуда, 2 години ако направи ново кривично дело во рок од пет години.
За Марјан Шумуликовски – условна осуда, а доколку направи ново кривично дело во рок од пет години ќе има затвор од две години.
Силвана Златкова – условна осуда, две години затвор ако во рок од пет години стори ново кривично дело.
Васил Исакоски – условна осуда, а ако стори ново кривично дело во наредните пет години ќе треба да издржи казна затвор од две години.
Валентина Симоновска – условна осуда, со казна затвор од две години доколку обвинетата во наредните пет години стори ново кривично дело.
„Мотивацијата и потребата да се воспостави целосната контрола врз целокупниот општествен живот доведува до таму да не се прислушува само политичкиот противник, туку се проширува и на соработниците. Поразително е што прислушувањето се вршело од УБК, од системи кои треба да служат да обезбедат безбедност на граѓаните. Со умисла е оневозможена опремата за прислушување за да не послужи како доказ во кривична постапка. Наводите дека не се прислушувало со надворешна опрема, немаат докази. Оваа кривична постапка треба да биде опомена и порака за институциите да воспостават контрола, за да нема вакви размери за злоупотреба. Доколку имало вакви механизми за контрола, нема да има злоупотреба од волкави размери. Судот со сиот респект на одбраната, актот за помилување нема правно дејство“, рече судијата Владимир Туфегџиќ.
„Судот се увери дека незаконитото прислушување и следењето на комуникациите е направено преку УБК, а не дека следењето е вршено од трета страна. Се утврди дека прислушувањето е извршено од злосторничкото здружение кое го организирал Сашо Мијалков. Организатор е Сашо Мијалков, кој поседувал реална моќ во општеството. Креатори на групата се и Горан Грујевски и Надица Николиќ. Судот ја ценеше одбраната на Мијалков, но не даде верба бидејќи е спротивно на докзите“, додаде судијата Туфегџиќ.
„Масовното прислушување се случувало во една од најважните институции во државата, во УБК. Со оглед дека овој предмет е еден од најважните предмети на СЈО, од кои зависат другите предмети, судечкиот совет направи напори да го реши во најкраток можен рок и да добие судски епилог“, рече судијката Џенета Бегтовиќ.
Предметот „Таргет-Тврдина“ се судеше три години. Обвинителите Ленче Ристоска и Трајче Пеливанов докажаа пред судот дека по наредба на Мијалков како организатор на група се вршело нелегално прислушување без судски налог со системите во УБК. Тој и Грујевски ја имале контролата на сите прислушувани телефони и лично од своите компјутери и сами ги слушале разговорите. Обработка на поедини задачи вршела и Надица Николиќ, како и останатите вработени во УБК.
Ексминистерката Јанкулоска беше обвинета дека по наредба на Мијалков, а заедно со Тони Јакимовски, преку формирана комисија дале наредба да се уништат системите за следење на комуникациите на МВР. Со цел да се спречи докажувањето на нелегалното прислушкување, системите ги уништиле сега обвинетите Грујевски и Бошкоски. На овој начин ја оштетиле државата за 10 милиони евра.
Претходно, адвокатот Миле Петровски кажа дека Сашо Мијалков не ги следел комуникациите, ниту преслушувал разговори од неговата канцеларија во УБК. Беше побарано и ослободување на Мијалков од обвинението, бидејќи не сторил ништо од работите за кои го обвинуваа обвинителите.
Јанкулоска, пак, кажа дека нејзината совест е чиста. Таа посочи дека е жртва на овој, како што го нарече, монструозен процес.
Јанкулоска во завршните зборови побара ослободителна пресуда.
И службеничката Николиќ докажуваше дека не е виновна, барајќи да биде ослободена. Адвокатот на избеганиот Грујевски, во завршните зборови посочи дека нема да се изјасни за евентуална вина кај неговиот клиент, посочувајќи дека не треба да му се суди затоа што Грујевски не е во судницата и е во бегство.
Процесот го водеше судијката Џенета Бегтовиќ. Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.
Над 130 физички и правни лица имаат поднесено и барање за оштета во предметот „Таргет-Тврдина“. Меѓу нив се ексфункционери, политичари, новинари, бизнисмени. Но, како оштетени, иако бараа, не се ставени ексминистерот Миле Јанакиески и Гордана Јанкулоска.
Јанакиески беше во 90 отсто од нелегално слушаните разговори, односно СЈО за него имаше над 80.000 снимки во кои разговара со различни луѓе. Голем број разговори има и ексминистерката Јанкулоска, која е осудена во истиот предмет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пензионерите и учениците ќе ги добијат парите – помош од државата во втората половина на декември

Во втората половина на декември пензионерите, учениците и студентите ќе ја добијат првата рата парична помош од државата, дел од последниот пакет антикризни мерки на Владата. Од Министерството за труд социјала за „Макфакс“ велат дека исплатата на финансиската помош ќе биде регулирана со закон за финансиска поддршка на ранливи категории граѓани кој заеднички ќе го донесат Министерството за труд и социјала и Министерството за образование.
„Пензионерите и корисниците на социјални права предвидени во мерките е предвидено да ги добијат правата на своите трансакциски сметки, сметките на кои ги примаат пензиите или го остваруваат правото, во втората половина од декември. Финасиска поддршка ќе добијат ученици и студенти, најранливите категори граѓани, пензионери приматели на најниски пензии, корисници на надоместок заради попреченост, самохрани родители – корисници на гарантирана минимална помош и родители на деца со попреченост до 26 години кои користат посебен додаток“, велат од кабинетот на министерката Јована Тренчевска.
Парична помош од државата ќе добијат вкупно 187.000 пензионери. Колку им е помала пензијата толку е поголема помошта која ќе ја добиваат во следните пет месеци. Пензионерите со пензии до 14.000 денари ќе добиваат по 3.000 денари, оние со пензии од 14.000 до 16.000 денари ќе добиваат по 2.000 денари, а пензионерите со пензии од 16-19.000 денари ќе добиваат по 1.500 денари во следните пет месеци.
Ученици кои потекнуваат од семејства со месечни примања до 50.000 денари ќе добиваат помош од држава еден месец повеќе од пензионерите, односно шест месеци. Со мерките се опфатени над 105.000 ученици. Основците ќе добиваат по 1.200 денари, а средношколците по 1.800 денари месечно.
Најдолго, односно седум месеци, помош од државата ќе добиваат студентите. Опфатени се 15.000 студенти кои не живеат во местото на студирање. Ќе добиваат ваучер за превоз во вредност од 600 – 1.200 денари.
Најранливата категорија граѓани во која Владата смести вкупно 16.741 лице, ќе добиваат по 2.000 денари во следните пет месеци. Во оваа категорија спаѓаат корисниците на надоместок заради попреченост, самохраните родители корисници на Гарантирана минимална помош и родителите на деца со попреченост до 26 години.

Mерките се правени за граѓаните, не се правени за изборите, рече премиерот Ковачевски
Веднаш откога ги соопшти мерките, пред два дена, на премиерот Димитар Ковачевски му беше забележано дека тие се димензионирани како предизборен поткуп оти истекуваат околу изборите планирани за следната година. Тој објасни дека некои мерки истекуваат пред изборите, планирани за мај следната година, а некои по изборите и нагласи дека мерките се правени за граѓаните не се правени за изборите.
„Макфакс“ побара објаснување што било клучно во одредувањето колку месеци ќе трае секоја од мерките кои предвидуваат парична помош. Од кабинетот на министерката Тренчевска објаснија дека кај учениците се раководел од учебната година, а кај пензионерите од месеците во кои се чувствуваат ефектите од продолжената енергетска криза.
„За учениците и студентите периодот на финансиска поддршка е планиран согласно траењето на учебната година, а за пензионерите со ниски пензии и ранливите категории на граѓани поддршката е планирана да ги покрие месеците кога трошоците на домаќинствата за енергенси се зголемени. Мерките се насочени кон таргетирана поддршка на ранливи категории на граѓани во услови на зголемени трошоци на живот, како и продолжените ефекти од енергетската криза и стабилизирање на ценовната криза“, објаснуваат од кабинетот на Тренчевска.
Овој пакет мерки, деветти по ред на Владата е со вкупна вредност од 662 милиони евра и покрај мерки за помош на учениците, пензионерите и најранливите категории граѓани, предвидува мерки и субвенции за земјоделците, за компаниите, мерки за зголемување на платите во јавниот сектор, но и мерки за зголемување на платите во приватните компании.
Македонија
Мицкоски – Обрајен: Стратешки интерес на Македонија е заштита на националните и идентитетски обележја и влез во ЕУ

Претседателот на ВМРО-ДПМНЕ, Христијан Мицкоски заедно со потпретседателите на ВМРО-ДПМНЕ, Тимчо Муцунски и Владо Мисајловски оствари средба со Џејмс Обрајен, помошник државен секретар за Европски и Евроазиски прашања на САД.
На средбата соговорниците ги потврдија добрите односи и потребата за ползување на придобивките од стратешкото партнерство на САД со Македонија.
Воедно Мицкоски истакна дека стратешки интерес на Македонија освен членството во Европската Унија е и заштита на националните и идентитетски обележја на македонскиот народ и Македонија.
Од страна на Мицкоски беше афирмирана потребата за сериозна борба против корупцијата и криминалот како голем проблем на граѓаните, и неопходноста од системски реформи кои ќе го подобрат стандардот на државата.
Соговорниците се осврнале на повеќе прашања од регионално значење како и идните политики во однос на тие теми и области.
Македонија
Заврши првиот ден од самитот на ОБСЕ во Скопје: во фокусот војната во Украина

Првиот ден од 30. Самит на министрите за надворешни работи на Организацијата за безбедност и соработка во Европа (ОБСЕ) заврши денеска во Скопје и ќе продолжи утре.
Во фокусот на обраќањата на шефовите на делегациите беше војната во Украина, а најголемо внимание, според написите во медиумите, привлече присуството и обраќањето на рускиот министер за надворешни работи Сергеј Лавров.
Лавров денеска изјави дека ОБСЕ е пред колапс и дека Западот ги убива шансите за заживување на организацијата.
Ова е првпат Лавров да престојува во европска земја членка на НАТО од почетокот на руската специјална операција во Украина.
Иако изминативе денови се очекуваше средба помеѓу Лавров и државниот секретар на САД Ентони Блинкен бидејќи тие првпат ќе се затекнеа заедно на едно место, тоа не се случи. Имено, Лавров пристигна во Скопје откако Блинкен го напушти и отпатува за Тел Авив, анализираат медиумите во регионот.
На најголемиот меѓународен политички настан организиран во Северна Македонија од нејзината независност присуствуваат шефовите на дипломатиите на најголемиот број земји-учеснички на ОБСЕ – САД, Канада, Велика Британија, министрите на земјите членки на ЕУ и НАТО, од Медитеранот, Блискиот Исток и Централна Азија.
За утре се планирани три настани на теми: Млади и граѓанско општество, За луѓето е влијанието на теренските операции на ОБСЕ во 2023 година и Зачувување на плурализмот, безбедност на новинарките.
Министерскиот состанок започна вчера со неформална вечера на повеќето министри, каде тема на разговор беше воената агресија врз Украина и потребата од функционална Организација во време на конфликти и зголемени тензии.
Министрите за надворешни работи на Србија, Црна Гора, Северна Македонија, Босна и Херцеговина и Албанија денеска во Скопје, за време на Министерскиот совет на ОБСЕ, потпишаа заедничка декларација за борба против корупцијата.
Шефовите на дипломатиите Ивица Дачиќ, Филип Ивановиќ, Бујар Османи, Елмедин Конаковиќ и Игли Хасани во Заедничката изјава како клучни точки ги наведуваат промоцијата на дигиталните алатки за рано откривање на криминалот, спречување на корупција и зголемена транспарентност, ефикасно користење на алатките за враќање на средствата и зголемување на капацитетот за намалување на ризиците поврзани со дигиталните средства, како што се криптовалутите, во контекст на перење пари.