Македонија
16 термоелектрани на Балканот загадуваат повеќе од 250 термоелектрани во ЕУ

Шестнаесет термоелектрани на Западен Балкан ги загадуваат регионот и Европа повеќе од сите други 250 европски електрани на јаглен.
Најновиот извештај на Европската енергетска заедница со седиште во Виена и мрежата на невладини организации предводени од Алијансата за здравје и животна средина и европската организација за заштита на животната средина „”Europe Beyond Coal“, предупредуваат дека 16 термоелектрани на западен Балкан ја загадуваат цела Европа повеќе од сите други 250 европски електрани на јаглен.
Извештајот е објавен неделава во Брисел со намера владите во земјите, регионот, граѓаните и Европската Унија да предупредат дека загаденоста во Северна Македонија, Босна и Херцеговина, Косово, Црна Гора и Србија е неподнослива и дека овие земји стануваат убијци на цела Европа, пишува „балканс.алџезира.нет“.
Францускиот дневен весник на левиот центар, „Либератион“, еден од трите водечки весници во Фрација, во издание од 22 февруари во детална анализа наведува дека поради застареноста на термоелектраните, отсуството на визионерската развојна политика и човековата негрижа кон животната средина, термоелектраните во регионот во просек емитуваат за 20 пати повеќе сулфур-диоксид и 16 пати повеќе отровни честички отколку оние во Европа.
Весникот ги пренесува наводите од најновите европски извештаи според кои здравствените трошоци кои можат да се доведат во врска со најголемите загадувачи во Европа изнесуваат од 6,1 до 11,5 милијарди евра годишно.
„Овие трошоци не ги плаќаат само граѓаните и економско загрозените земји, туку и членките на Европската Унија, имајќи в предвид дека загадениот воздух нема патни исправи, ниту пак може да биде сопрен на границата со Унијата“, наведува францускиот весник, повикувајќи се на изјави на енергетски и здравствени експерти.
Во годишниот европски извештај е наведено дека термоелектраната „Угљевик“ во Босна и Херцеговина емитува сулфурен диоксид колку сите германски термоелектрани заедно.
Во Македонија имало 104 случаи на прерана смрт од загадувањето на воздухот во 2016 година, 216 случаи на бронхитис, 46 случаи на хроничен бронхитис кај возрасни и 70 приеми во болница поради респираторни или кардиоваскуларни симптоми.
„Либератион“ потсетува дека земјите од западен Балкан мораат да почнат да ги намалуваат своите штетни емисии и на основа на меѓународните договори. Покрај Договорот за стабилизација и асоцијација кој сите земји од регионот го имаат потпишано со ЕУ, тука е и Договорот за енергетската заедница според кој поголем дел од термоелектраните во регионот веќе би требало драстично да ги намалат штетните емисии.
Од десетте најголеми термоелектрани кои испуштаат најголема концентрација на сулфур диоксид на тлото во Европа, пишува „Либератион“, девет се лоцирани на западен Балкан. Истото важи и со класификацијата на најотровните честички (PM10), од кои осум најотровни се доминантни во земјите од Западен Балкан. Поради загаденоста на воздухот ширум светот годишно предвреме умираат речиси седум милиони лица, додека од истата причина во ЕУ годишно умираат околу 400.000 луѓе, пишува францускиот весник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се евидентирани вкупно 22 пожари на отворен простор

На територијата на државава денеска до 18 часот се евидентирани вкупно 22 пожари на отворен простор, од кои 14 се активни, а по четири се под контлола и изгаснати.
Како што информираат од Центарот за управување со кризи (ЦУК), активни пожари има: во Општина Василево, Радовиш и Берово – с. Нивичино, планината Голем Готен и Малешевските планини (нискостеблеста шума, смрека, грмушки, ниска вегетација); Општина Прилеп 1 – с. Бешиште, Бешишки Рид, крак према с. Градешница и границата со Р. Грција (мешана шума); Општина Прилеп 2 – активен кракот кон с. Дрен, проширен кон с. Галиште (Кавадарци), додека делот помеѓу Царевиќ и Смолани е под контрола (мешана шума и ниска вегетација); Општина Македонски Брод – помеѓу с. Црешево, Локвица и Крапа (деградирана дабова шума, грмушки, ниска вегетација); Општина Желино – меѓу с. Церово и Групчин (нискостеблеста и деградирана шума); Општина Струмица – с. Баница и нас. Софилар (висока трева); Општина Петровец – с. Средно Коњаре, кај реката Пчиња (ниска вегетација и ниска шума); Општина Крива Паланка – с. Нерав (висока борова шума); Општина Старо Нагоричане и Куманово – с. Облавце кон с. Бењаковце (ниска вегетација); Општина Старо Нагоричане 2 – с. Руѓинце (ниска вегетација); Општина Куманово – нас. Бедиње (ниска вегетација); Општина Гази Баба – с. Трубарево (ниска вегетација); Општина Зелениково – с. Гумалево (ниска и мешана вегетација); и Општина Василево 2 – с. Сушево (ниска вегетација).
Под контрола се ставени пожарите во Македонски Брод 1 – с. Грешница (мешана шума и сува трева); Македонски Брод 2 – с. Латово (ниска вегетација и деградирана шума); Карбинци – с. Јунузлија (шума); и Штип – помеѓу с. Драгоево и Селце (нискостеблеста шума, прнар и сува трева);.
Изгаснати се пожарите во Струмица – м.в. Три Води (ниска вегетација и мешана шума); Василево – с. Василево (ниска вегетација); Струга – с. Калишта (ниска вегетација и ѓубриште); и Шуто Оризари – ул. Брсјачка Буна (дива депонија).
Македонија
Родителите на загинатите деца во „Пулс“ прашуваат до каде е постапката за полициските службеници за пожарот

Родителите на загинатите деца во пожарот во кочанската дискотека „Пулс“ на денешниот 16. Марш на ангелите пред зградата на Полициската станица во Кочани побараа одговор од ОЈО ГОК, кое ја води постапка за над 20 те полициски службеници од ОВР Кочани и СВР-Штип, до каде е истрагата за нив и формирање на обвинителен предлог.
-Сакаме да ги прашаме до каде е постапката на ОЈО ГОК или чекат одмори, да си одведат нивните деца на одмор, на вода, а ние на нашите деца врз гробовите да им фрламе вода за да ги освежеме. Блазе си им, нека им служи на чест, оти развлекуваат само, вели мајка на загинато момче.
На денешниот Марш на ангелите главната порака им беше „Слушнето го гласот на оние што повеќе не можат да зборуваат“. Родителите и семејствата на загинатите деца што учествуваа на протестниот марш се револтирани што нивниот настан денеска имаше убедливо најслаб одѕив. Револтирано им се „заблагодарија“ на поддршката на граѓаните и семејствата кои имаат настрадано деца, а денеска не учествуваа на маршот кој почна во 18.05 часот од Паркот на револуцијата, а заврши пред зградата на Судот и Обвинителството во Кочани.
Една од мајките пред зградата на Општина Кочани истакна дека на денешен ден се случи катастрофалниот земјотрес во Скопје, кој однесе голем број на човечки животи и направи материјални штета. Посочи дека на денешниот Марш на ангелите им одаваат почит на загинатите во земјотресот во Скопје во 1963 година, но истовреме се сеќаваат и на оние кои помогнале да се обнови градот Скопје.
Македонија
МВР во Охрид покажа вежба на спасување на вода и евакуација на патници од опожарен пловен објект

Со показна вежба на спасување на вода и евакуација на патници од опожарен пловен објект, како и со презентација на дел од опремата, возилата и другите материјално технички средства што ги користат полициските службеници при извршувањето на секојдневните задачи, попладнево во Охрид беше реализирана активноста на МВР насловена „До Вас, за Вас“.
Активноста е осмислена со цел приближување на полицијата до граѓаните, во рамки на концептот „Комјунити полисинг- Работа во заедницата“, подигнување на јавната свест за зголемена јавната безбедност во заедницата, спроведување едукативни и интерактивни активности со граѓаните поврзани со превенција и сузбивање на разните форми на криминал…
Министерот за внатрешни работи, Панче Тошковски, кој ги следеше активностите истакна дека со полициските службеници од повеќе оддели во рамки на МВР се презентираат активностите што ги преземаат, средствата што ги користи службата, начинот на спроведување на полициските активности и сите дејствија што се преземаат во рамки на редовното полициско работење.
– Еден од поводите за посетата на Охрид денеска е и заедничката соработка што ја имаме со српските полициски службеници во Охрид. Имаме четворица колеги од Србија кои во летниот период се заедно со нашите полицајци патролираат, си помагаат во рамки на сите дејствија што треба да бидат преземени, а се во делот на српските туристи. Ова е една убава прилика да поразговараме со нив за тоа како ги обавуваат нивните службени задачи тука, рече Тошковски.
Тој уште додаде дека македонската полиција е тука за граѓаните, да им обезбеди мирен престој во туристичките центри.
– Безбедносната сеостојба во Охрид е стабилна, а туристите можат да уживаат во преубавите туристички центри…Во рамки на летната сезона СВР – Охрид е потпомогната со полициски службеници од други центри. Така што и оваа година ќе бидеме подготвени да ги преземени сите дејствија и да одговориме на сите предизвици, рече тој.