Македонија
Доделени наградите за истражувачко новинарство на МИМ

На конкурсот „Најдобра истражувачка сторија за 2008 година“ организиран од МИМ се пријавиле 45 новинари и редакции, со 60 истражувачки стории. Меѓу наградените е и новинарот Атанас Кировски, за текстовите на тема „Македонски идентитет“, објавени во магазинот Форум.
Првата награда на конкурсот ја делат Сузана Тасева за сторијата „Окованото момче од Ангелски“, објавена на А1 телевизија и Марјан Николовски за сторијата „Хотел Изгрев“, објавена на ТВ Сител и во весникот Вечер. Втората награда ја доби Наташа Бошковска за текстот „Храна на македонските пазари“, објавен во весникот Нова Македонија, а третата ја добија Бардуљ Заими и Урим Хасипи за натписот „Пиратерија“, објавена во весникот Факти. Оваа година во МИМ на конкурсот се пријавиле новинари со голем број квалитетни стории, поради што беа доделени пофалници на новинарите Владимир Тевчев за случајот „Топилница“ објавен на ТВ А1 и во весникот Време, Весна Коловска за радио-сторијата за „Ромските деца на улица“ објавена на радиото Канал 77, Мери Јордановска, за текстовите на тема „Империјата на Софрониевски и на Антиќ“, објавени во весникот Нова Македонија и Атанас Кировски, за текстовите на тема „Македонски идентитет“, објавени во магазинот Форум. Комисијата ги истакна емисијата Код и весникот Нова Македонија како проект и редакција кои особено придонесуваат кон унапредување на истражувачкото новинарство во Македонија. За наградените и пофалените одлучуваше независна комисија составена од Сашо Кокаланов, главен и одговорен уредник на дневниот весник Дневник, Бесим Илјази, главен уредник на Коха , Снежана Лупевска, заменик главен уредник во ТВ А2 , Борис Георгиевски, уредник во ТВ Алсат М и Столе Наумов, уредник во Канал 77. Наградата се доделува осма година по ред, а доделувањето и организацијата се целосно финансирани од МИМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Вреди ќе се менува, платформата станува партија

Од платформата Вреди наскоро ќе произлезе нова политичка партија, која ќе настапи обединето на претстојните локални избори. Како што најави вицепремиерот и лидер на Демократско движење, Изет Меџити, процедурите за формирање на новиот политички субјект ќе започнат веќе следната недела.
„Граѓаните испраќаат јасна порака – сакаат единствена, организирана и координирана понуда. Јавно велам: не е важно кој ќе биде претседател, важно е идејата да успее. Целта ни е обединување пред локалните избори“, изјави Меџити во емисијата „ПодГо“ на Телеграфи Македонија.
Според него, новата партија ќе има заеднички штаб, информативен центар, програма и листи за советници, додека кандидатите за градоначалници сè уште не се дефинирани. Меџити додава дека не гледа проблем во тоа што името на партијата и нејзиниот лидер сè уште не се познати, бидејќи „најважна е суштината, а не формата“.
Во меѓувреме, одлуката на Алијансата за Албанците да настапи со свои листи за советници на локалните избори предизвика тензии во рамките на коалицијата. Претседателот на партијата, Арбен Таравари, изјави дека одлуката не значи напуштање на Вреди и дека остануваат дел од Владата.
Сепак, Меџити смета дека оваа постапка оди во прилог на нивниот заеднички политички противник.
„Оваа одлука е во интерес на ДУИ. Верувам дека јавноста бргу ќе ја препознае суштината на ваквиот потег. Ние никого не сме исклучиле – тој сам се дистанцираше“, порача Меџити.
Тој додаде дека ова отвора и прашање за стабилноста на владината коалиција, но засега не е донесена одлука дали ќе се бара разрешување на Таравари од министерската функција во здравство.
Македонија
СДСМ: Џабе е извинувањето на Љутков, културните работници без пари го слават Велигден

Опозициската СДСМ остро ја обвини Владата предводена од ВМРО-ДПМНЕ за, како што велат, „груб и срамен удар врз културните работници“, токму во пресрет на големиот христијански празник Велигден.
Според партијата, наместо со зголемени плати како што било договорено во Колективниот договор од 2021 година, вработените во културата велигденските празници ги дочекаа без ниту денар на сметка.
„Од мартовската плата требаше да започне корекција на примањата, согласно Колективниот договор. Наместо тоа, културните работници беа игнорирани, а од Министерството за култура стигнаа манипулативни изјави – дека не работеле доволно, дека не ја заслужуваат платата, дека платите биле ‘високи’. Ваквите изјави се навредливи и дискредитирачки“, велат од СДСМ.
Од партијата порачуваат дека ваквиот однос е доказ за целосна незаинтересираност на Владата за луѓето кои, како што наведуваат, ја носат културата на грбот.
„Зошто не се почитува колективниот договор? Зошто културните работници се навредуваат од страна на институцијата што треба да ги штити? Ако Љутков не е способен да ги исполни обврските, нека си поднесе оставка“, се вели во изјавата на СДСМ.
Од таму потсетуваат дека културните работници не се статисти во општеството, туку клучни носители на вредности и традиции и заслужуваат третман со достоинство, а не молк и игнорирање.
Македонија
Фатен пијан крадец на „голф“ во Неготино, возачот излетал од патот

Дваесет и осумгодишен жител на Неготино бил лишен од слобода откако украл автомобил од свој сограѓанин, а потоа, возејќи под дејство на алкохол, излетал од коловозот на локалниот пат кон селото Курија.
Како што соопшти Министерството за внатрешни работи, на 20 април 2025 година околу 04:20 часот, полициски службеници од ОВР Неготино го уапсиле С.Д. (28), кој неовластено присвоил патничко возило „фолксваген голф“ со неготински регистарски таблици.
Возилото било сопственост на Л.И. (28) од Неготино и според пријавата, било паркирано пред неговиот дом кога С.Д. го одзел и се упатил кон селото Курија. Таму, изгубил контрола и излетал од патот.
„При извршените проверки било утврдено дека возачот имал 0,72 промили алкохол во крвта“, велат од полицијата.
С.Д. бил задржан во полициска станица, а по целосно документирање на случајот, против него ќе бидат поднесени соодветни кривични пријави.