Македонија
Милошоски со писмо до Бакојани

Министерот за надворешни работи, Антонио Милошоски, упати писмо до Дора Бакојани, шефицата на грчката дипломатија
Во писмото, Милошоски, пишува дека двете држави заеднички треба да ја искажат својата обврска и одговорност за натамошното развивање на грчко-македонските односи, во духот на добрососедството и партнерството. Тој, потсетува на трите македонски иницијативи предложени до грчката страна на официјалниот состанок во рамките на ОН, за прашањето за името меѓу двете страни, што се одржа во Охрид, во јануари 2008 година.“Воден од словото и духот на Времената спогодба од 13 септември 1995 година, би сакал да го повторам и, со тоа, по втор пат да предложам потпишување Декларација за пријателство, добрососедство и соработка, меѓу нашите две земји. Цврсто сум уверен дека оваа Декларација не само што ќе придонесе кон пријателството на народите од двете земји за денешните и идните генерации, туку и ќе даде значаен придонес кон мирот и развојот на регионот на Југоисточна Европа и на Европа во целина“, се вели во писмото на Милошоски, упатено до Бакојани. Министерот Милошоски, предлага заедничко разгледување на историските настани, поради искажаната чувствителност на Грција за историските прашања. “Во овој контекст, би сакал уште еднаш да предложам основање Заеднички комитет за образование и историја. Подучувањето заедничка и повеќеперспективна историја на Балканот може да игра важна улога во процесот на помирување со минатото, преку спречување на употребата на историските настани за поттикнување идни недоразбирања“, се вели во писмото до Бакојани.Милошоски ја повикува Грција двете држави да ја продолжат праксата на одржување редовни консултации и состаноци на различни нивоа, како и на потпишување билатерални спогодби во сите области од заеднички интерес. “Затоа, би сакал да го повторам нашиот Рамковен предлог за унапредување на билатералните односи меѓу нашите две земји. Ова ќе придонесе кон понатамошното зајакнување на соработката и меѓусебното разбирање, како и кон унапредување на регионалната соработка, што е неопходен услов за создавање стабилен и просперитетен регион и негова интеграција во европските и евро-атлантските структури“, се вели во писмото.Милошоски, изразува надеж дека Грција, како земја со силна посветеност на целите и начелата на Повелбата на Обединетите нации, Финалниот документ од Хелсинки и Париската повелба, ќе ги прифати неговите иницијативи со цел, развивање на пријателските односи меѓу двете земји.Со ова ќе се испрати силна порака за посветеноста и конструктивниот приод кон тековните разговори меѓу Република Грција и Република Македонија под покровителство на ОН за надминување на разликата околу името.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Партијата Левица со поддршка на првомајските протести

Во време кога капиталот ја гаси секоја искра на отпор, платите стагнираат, цените растат, а власта парче по парче ги крати работничките права и ја продлабочува социјалната неправда, време е за работничка солидарност. 1 Мај е денот кога работникот треба да покаже дека неговиот глас никогаш нема да биде замолчен, порачуваат од политичката партија Левица.
Од партијата велат дека владата на ДПМНЕ-ЗНАМ-ВРЕДИ со своите празни ветувања за обновување на „гордоста“, оставила работниците да се борат сами за своето егзистенцијално опстанување, додека постепено се губи достоинството на трудот.
„Партиите на олигархијата, исклучени од реалноста, за нецелосен мандат на власт, во повеќе наврати ја демонстрираа својата оттуѓеност од реалните потреби на работниците и наклонетоста кон интересите на капиталот, и бессрамно одбија реални решенија за подобрување на правата на работникот, додека тие уживаат во своите удобни фотељи. Така за само неколку месеци власт во работникот доби зголемена сиромаштија и институционализирана неправда која ги погодува најранливите во општеството.
Потсетуваме дека, додека Левица нудеше законски решенија за подобрување на работничките права – работникот да добива надоместок за патни трошоци, платата да ја добива навреме до 5-ти во месецот, избегнувајќи непотребни казнени камати за задоцнето плаќање, породилно отсуство за мајките од 18 месеци, владата на ДПМНЕ-ЗНАМ-ВРЕДИ јасно застана на страната на капиталот и ноншалантно ги одбиваше сите предлози кои значеа враќање на достоинството за работникот, а најлошо од сѐ – се изземаа од трипарттитниот договор со капиталистите, кадешто требаше да бидат гарант дека работниците ја имаат подршката од државата“, велат од Левица.
Затоа, велат од атаму, 1 Мај не е ден за тишина – 1 Мај е ден за отпор, за гласно, организирано не на капиталистичкиот систем што ги гази нашите животи.
„За систем што ќе служи на работникот, а не на профитот. Левица како единствена партија која се бори за подобар статус на работникот, го подржува протестот на ССМ за 1 Мај, и ги повикува сите работници на сплотеност и истрајност во борбата за работничките права“, се вели во соопштението на Левица.
Македонија
ССМ утре на протест со истото барање како и лани: Протестираме за најмалку 500 евра минимална плата

Исто како и на ланскиот првомајски протест, и оваа година Сојузот на синдикатите на Македонија (ССМ) ги повика работниците и нивните поддржувачи на протест за најмалку 500 евра минимална плата, 100 евра зголемување на сите други плати и почитување на колективните договори. Минатата година претседателот на ССМ, Слободан Трендафилов, кога повикуваше на првомајски протест, рече дека од новата Влада ќе побара покачување на минималната плата уште во првите сто дена, но една година подоцна барањето не е исполнето, па и утрешниот првомајски протест ќе биде со истите барања.
„Нашите барања не се од денес, не почнаа вчера и нема да завршат утре. Протестот е начин на Први мај да изразиме незадоволство од висината на платите што ги примаат работниците во Македонија, а како што многупати сме кажале досега, тие се најниски во регионот, а да не зборуваме и за пошироко. ССМ ги повикува сите што му мислат добро на работникот во текот на утрешниот ден, Први мај, во 11 часот, да ни се приклучат на работничкиот протест со рута на движење Собрание – Стопанска комора – Влада. Денеска, синдикатите во Македонија имаат многу причини да излезат, да демонстрираат и да протестираат, а не да прославуваат. Денеска, имаме можност да покажеме дека сме тука за работниците“, рече претседателот на ССМ, Трендафилов.
На утрешниот протест, Трендафилов, одговарајќи на новинарско прашање, рече дека нема да има сендвичи, но ќе се протестира за работниците да може да се изборат не само за сендвич туку за да може да обезбедат далеку повеќе работи за семејствата.
Протестот ќе почне утре во 11 часот пред Работничкиот дом.
Македонија
Формирана Меѓупартиска парламентарна група за следење на имплементацијата на обврските од Берлинскиот процес

Денеска, во Собранието, се одржа конститутивна седница на Меѓупартиската парламентарна група за следење на имплементацијата на обврските од Берлинскиот процес и реформската агенда од планот за раст.
Иницијативата за оваа Група беше поднесена во октомври минаната година и таа беше прифатена од сите партии. На денешното нејзино конституирање формално за нејзин претседател едногласно беше избран потпретседателот на Собранието, Антонијо Милошоски, на предлог на координаторот на ВМРО-ДПМНЕ, Никола Мицевски.
Милошоски се заблагодари за довербата и вети што повеќе активности на Групата. Тој истакна дека формирањето на оваа Група е од исклучителна важност за Собранието за обезбедување парламентарен надзор и поддршка во спроведувањето на клучните реформски обврски што произлегуваат од Берлинскиот процес и новата реформска агенда од планот за раст како стратешки приоритети на државата. Во насока на нејзино поуспешно дејствување предложи членување не само на моментните 29 пратеници, туку и на невладини организации.
Меѓупартиската парламентарна група за следење на имплементацијата на обврските од Берлинскиот процес и реформската агенда од планот за раст ќе се занимава со:
· степенот на реализација на обврските поврзани со заедничкиот регионален пазар;
· јавните и надзорните расправи со претставници на извршната власт, а во врска со проектите што се дел од целите на Берлинскиот процес;
· претставување на Собранието на регионални и меѓународни настани организирани во рамките на Берлинскиот процес;
· други активности поврзани со планот за раст на Европската комисија.
Во Берлинскиот процес учествуваат 9 земји членки на ЕУ, како и Велика Британија, а од пред една година не се вклучени само владите, туку и парламентите. Во моментот со Берлинскиот процес претседава Германија, но од јуни претседавањето ќе го презеде Велика Британија.