Имајќи го предвид и обраќањето на папата Бенедикт XVI, католичката црква овој период на голема светска економска криза го гледа како опасност по етичкиот живот на верниците, барајќи од нив свртување кон вредностите на христијанството и надежта за пребродување на тешкото време

.Бискупот скопски и апостолски егзарх во Македонија, Киро Стојанов на Велигденската воскресна литургија што во сабота вечерта се одржа во централната католичка црква „Пресвето Срце Исусово“ во Скопје повика на зачувување на надежта и меѓусебно почитување.„Драги браќа и сестри, во велигденската тајна пред нас е таинството на Христовите страдања, смрт и Воскресение. По одот на Синот кон местото на жртвување се открива таинството на  ’сокриениот почеток на светот’. Во љубовта која е дарувана се наоѓа изворно таинство и љубејќи, и ние ја сфаќаме пораката на спасението, го наоѓаме патот.Денешниот човек соочен со страдања ја губи надежта. За апостол Павле надежта не е само некој идеал или некое чуство, туку жива личност Исус Христос, Божји Син. „Живиот Бог“ е Христос воскреснатиот и присутен во светот. Тој е вистинската надеж. Христос кој живее со нас и во нас и кој не повикува да бидеме учесници во истиот негов вечен живот. Во центарот на нашето празнување е силната вера која денес повеќе од било кога треба да ја препорачаме на луѓето од наше време. Христос влезе во нашата историја, ја откупи нашата историја и ги победи нашите слабости.Во воскресното таинство дознаваме дека љубовта е темел на бесмртноста, а бесмртноста се води единствено од љубовта. Ако Христос воскресна и ние ќе воскреснеме бидејќи со тоа се покажа дека љубовта е посилна од смртта. Затоа љубовта е таа која е посилна од смртта или воопшто не е љубов. Во Христос се покажа посилна од смртта, се покажа затоа што беше љубов за другите. Токму тоа е порака и за нас, да се почитуваме едни со други и на тој начин ќе го живееме Христос во себе.Во ова време и за овој Велигден, и на Вас почитувани верници, Ви препорачувам да се почитувате едни со други бидејќи Бог е љубов! Така на најдобар начин ќе докажеме дека веруваме во Христос Воскреснатиот и така ќе ја оправдаме надежта која е во нас. Нека светлината на Воскреснатото утро ги исполни Вашите срца со надеж и љубов и со радост дека сме испратени едни со други да си ги ублажиме тешкотиите со силата и љубовта на Воксреснатиот Исус Христос. Сите Вас Ве поздравувам и благословувам со велигденскиот поздрав Алелуја Христос Воскресе“, се вели во велигденската порака на бискупот скопски и апостолски егзарх во Македонија Киро Стојанов.Во соборниот католички храм на вечерната саботна миса, покрај католичките верници присуствуваа повеќе лица од јавниот живот од други конфесии.