Новoизбраниот претседател на Република Македонија Ѓорге Иванов во понеделникот се сретна со американскиот амбасадор Рикер и со поранешниот македонскиот претседател Глигоров, информираат од Кабиентот на Претседателот

На средбата со амбасадорот Филип Рикер во амбасадата на САД во Скопје, претседателот Ѓорге Иванов ги истакнал исклучително добрите односи меѓу двете држави. Иванов ја потенцирал важноста која Република Македонија и ја дава на евроатлантските интеграција и се заблагодарил за постојаната и цврста поддршка што на овој план во континуитет ја добива од САД. Претседалот Иванов нагласил дека ќе стори се’ што е во негова моќ да се постигне брзо и соодветно завршување на процесот на прием на Република Македонија во НАТО и почнување на преговорите за членство во Европската унија.На средбата со првиот претседател на Република Македонија, Киро Глигоров е посочено дека демократските процеси во земјава влегуваат во нова фаза, по годинашниве успешни парламентарни и локални избори. Оценето е дека тоа ќе биде уште една потврда за македонската подготвеност да продолжи на патот кон евроатланските интеграции. Иванов и Глигоров разговарале и за реформските процеси во Република Македонија, чија цел е да се постави основа за динамичен економски развој на државата и за отворање перспективи за нејзините граѓани. Иванов, како што  се вели во соопштението од неговиот кабинет, му се заблагодарил на Глигоров за годините посветени во служба на интересот на Република Македонија.