Мерките што ги презема Владата во Македонија во борбата против корупцијата се ефикасни, сметаат граѓаните, но исто така повеќе од 60 отсто велат дека има висок степен на корупција во институциите

Веројатно ваквото спротивставено мислење се должи на интензивната кампања што ја спроведе Владата во последниот период, смета Слаѓана Тасева, директорка на Траспарентност Нулта корупција, која на денешната прес-конференција ги презентираше резултатите од глобалното истражување на јавното мислење за корупцијата.“Можеби може да се смета за чудно или за апсурдно, дека граѓаните искажале од една страна недоверба кон институциите. Прашање е колку граѓаните ги поистоветуваат. Затоа што, ние имаме судство и имаме собрание и политичари и имаме Влада. Од друга страна, Владата направи голема кампања, преземаше многу активности за да ја презентира својата борба против корупцијата и можеби тоа е резултат и на тоа“, рече Тасева.За разлика од Македонија, Глобалниот корупциски барометар покажува дека генерално заложбите на Владите низ светот кои се борат против корупцијата не се сметаат за ефективни, дури 56 отсто од испитаниците го потврдиле овој заклучок. Македонците сметаат дека најкорумпирано е судството, дури 51 отсто од испитаниците рекле дека судството е екстремно корумпирано, а високо котираат и собранието, јавната администрација и приватниот сектор. На глобално ниво, политичките партии се гледаат како најкорумпирани, а следат парламентите, приватниот сектор, каде има и тренд на зголемување на процентот на корупција, па медиумите и судството. Македонија е во групата земји кои судството го сметаат за најкорумпирано заедно со Ерменија, Бугарија, Камбоџа, Хрватска, Грузија, Косово, Монголија, Перу, Сенегал и Уганда. Граѓаните од новите независни држави сведочат дека во најголем број се нашле во ситуација да им биде побаран поткуп, а следат оние од Африка, Латинска Америка, Азија, па земјите од ЕУ, Западен Балкан со Турција и последна е Северна Америка. Во земјите од Западен Балкан, каде спаѓа и Македонија, забележано е опаѓање на процентот на барање поткуп, споредено со испитувањето од пред две години. Во светот, полицијата е најчестата јавна институција која бара поткуп, а следат судството, катастарот, образованието, здравството, даночните институции и други установи.Граѓаните кои имаат помали примања, со други зборови сиромашните, се тие кои мора да плаќаат поткуп, за разлика од богатите кои имаат други начини и врски да стигнат до тоа што им треба. Покрај тоа што 30 отсто од испитаниците посведочиле дека им е побаран поткуп во некој институција во Македонија, сепак дури 80 отсто од испитаниците на глобално ниво не пријавуваат и не поднесуваат жалба. Најчеста причина за тоа е што не веруваат дека тоа нешто ќе смени, сметаат дека ќе изгубат многу време, а на трето место е стравот од притисок. Мал процент не знаат која е процедурата или пробале, но не можеле да пријават.Глобалното истражување на јавното мислење за корупција е спроведено на барање на Transparency International, на 73.132 испитаници во 69 држави, меѓу кои 27-те членки на ЕУ, Западен Балкан, нови независни земји, како Грузија, Ерменија, Азербејџан, Блискиот Исток и Северна Африка, латинска Америка, Азија и Пацифик и Северна Америка. Глобалниот барометар на корупција се спроведува на секои две години, а ги презентира секојдневните искуства со поткупот, ставовите на граѓаните за корупцијата во приватниот сектор и нивото на корупцијата во шест институции, како политички партии, јавни служби, парламент, бизнис, судство и медиуми.