Државниот јавниот обвинител Љубомир Јовески смета дека треба да има силно, професионално и одговорно обвинителство, да не се задоволуваат дневно – политички потреби и интереси за резултат на пазарење.

„Затоа ни е неопходен закон за ЈО кој ќе обезбеди услови, основи за силно професионално и не селективно и одговорно обвинителство. Решенијата во законот не треба да задоволуваат нечии дневно политички потреби и интереси, ниту да бидат резултат на пазарење, туку да го усогласат домашното законодавство со законодавството на ЕУ и на подобар начин да ја постават внатрешната организација на ЈО, пред се поради зголемување на ефикасноста во постапувањето изборот и унапредувањето на јавните обвинители и нивната одговорност“, рече Јовески на јавната дебата за последната верзија на законот за јавното обвинителство во Собранието.

Тој смета дека предложените решенија во работниот текст на законот за јавното обвинителство ја зацврстуваат самостојноста на јавните обвинители во постапувањето по конкретни предмети, а додека принципот на хиерархија се однесува на надзорот над законитото и навремено извршување на јавнообвинителската функција.

„Критериуми за оценка на јавните обвинители се стручност и квалитет на одлуките, ажурност и ефикасност, непристрасност и совесност, углед и етичност достојни за функцијата, соработка и однос спрема странките и другите вработени во Обвинителството, способност и спремност за стручно усовршување и стекнување со нови знаења и организаторски способности. Само врз основа на овие критериуми ќе се гради кариерата на обвинители и ќе се стави крај на влегување во Обвинителството во повисоки степени без неопходното искуство“, рече тој.

Јовески смета дека законот многу прецизно ги дава новите основи за дисциплинска и материјална одговорност на јавните обвинители. Според него добро е што во законските решенија изграден е став по предметите од организиран криминал и корупција да постапува ОЈО за гонење на организиран криминал и корупција наместо како што имаше идеи за формирање на две обвинителства, вели тој, додавајќи дека така нема да има прекплопување на надлежностите.

Јовески вели дека обвинителите од поранешното СЈО во законот немаат посебен третман, ниту пак се обвинители во Обвинителството за гонење организиран криминал, туку остануваат во обвинителствата каде беа вработени пред изборот на специјални обвинители.
Имајќи предвид дека тие работеле на одредени сложени предмети законот пропишува дека ќе продолжат да работат на овие предмети до нивно завршување. „Ваквото решение е основано заради ефикасност на кривичниот проблем со што сторителите на кривични дела ќе бидат изведени пред суд“, смета Јовески.

Тој додава дека јавниот обвинител не треба да се бира на предлог на политичките партии, туку дека тоа треба да биде во надлежност на Советот за јавни обвинители. Значајна е и финансиската самостојност и исто така важно е што средствата за работа на ЈО се обезбедуваат во висина од најмалку 0,4 посто од буџетот на државата, што е ново за разлика од сегашното финансирање на Обвинителството.

Владата на денешната седница го задолжи Државниот инспекторат за градежништво и урбанизам да изврши надзор над изградбата на градби од прва категорија на подрачјето на општините Охрид и Струга и да провери дали градежните инспектори ги извршуваат своите обврски во согласноаст со Законот за градењето и да достави за сето тоа информација до Владата до наредната седница.

Владата го усвои и извештајот за степенот на реализација на препораките и преземените активности за зачувување на статусот УНЕСКО – светско наследство на природното и културното наследство во Охридскиот Регион. Во извештајот до УНЕСКО се констатира дека Северна Македонија останува цврсто посветена на зачувување на статусот светско наследство за природното и културно наследство во Охридскиот Регион и се истакнуваат заложбите со кои значително се интензивираа активности за спроведување на одлуката на Комитетот за светско наследство за исполнување на препораките на Реактивната мониторинг-мисија, како и продлабочувањето на билатералната соработка со Република Албанија во насока на заедничко управување со природното и културното наследство во Охридскиот Регион.

Во текот на извештајниот период донесен е планот за управување со природното и културното наследство во Охридскиот Регион (2020-2029) и спроведена е и стратегиска оцена на влијанијата врз животната средина и културното наследство. Земјата исто така изработи инвентар на бесправно изградени објекти на територијата на Охридскиот Регион, со што се остварени предусловите да се премине на изработка на оценка на влијанието врз животната средина (ОВЖС) и оценка на влијание на културното наследство (ХИА).

Дополнително, почнати се санацијата и рехабилитацијата на колекторскиот систем на Охридското Езеро за што се обезбедени над 4 милиони евра, средства од државниот буџет, за изведување на работите и продолжен е проектот за пренасочување на течението на реката Сатеска.

„Законот е лоша имитација на оној од 2007 година, да беше реформски, ќе имавме сосема нов закон, а не лоша компилација од претходниот за кој имаше забелешки од Венециската комисија и тие да бидат вметнати во овој закон“, рече професорката по уставно право, Тања Каракамишева, на дебатата за законот за Јавното обвинителство. Според неа, со овој закон не е намерата да се донесе реформа во правосудниот систем, туку да се удомат кадрите на СЈО.

„Ова е имитација на реформски акт. Полтронско вметнување одредби од забелешките од 2007 година. Ќе ви дадам еден пример – ако некоја девојка во 2007 година побарала мислење од моден креатор за облека, дали по 13 години, кога таа е веќе оформена жена, би ја носела таа креација? Сметам дека предлагачот го користи овој закон да ги удоми кадрите на СЈО“, рече Каракамишева.

Таа додава дека законот е противуставен и дека во ваква верзија не треба воопшто да се носи, туку да се изработи нов. Вели дека сè уште стои на ставот дека и Законот за СЈО не требало да биде донесен.

„Цврсто стоев на ставот дека Законот за СЈО ќе го поткопа правниот систем во државата. Се покажа дека сум била во право“, додаде Каракамишева.