„Државата не е ничија сопственост. Не е сопственост на партиите, ниту на владата. Државата е на граѓаните. Таа е нашиот дом. За нашиот дом мора да се бориме сите“, вели претседателот на СДСМ, Венко Филипче, во видео-обраќањето по повод 8 Септември, Денот на независноста.

Филипче потсети дека пред 34 години, граѓаните со храброст и одговорност ја донесоа една од најважните одлуки во историјата на Македонија – одлуката да живееме во своја, независна држава. Таа независност не беше подарок, туку резултат на визија, мудрост и истрајност.

„Македонија е на тие што се борат со животот секој ден, на тие што се грижат за своите блиски, што работат, што плаќаат даноци, што не бараат привилегии. Македонија е и на тие што останаа овде, и на тие што заминаа, ама не заборавија.“

Во своето обраќање, Филипче предупреди дека денес државата е повторно пред закана – не од оружје, туку од корупцијата, неправдата, дискриминацијата и сиромаштијата. Тој укажа дека оваа власт ја претвора државата во сопственост на малкумина, а ја оддалечува од граѓаните.

„Сакам да ѝ порачам на власта – ова е земја на сите, за сите. Не е само ваша.“

Според него, патриотизам денес не значи само да се вее знаме, туку да се обезбеди фер судство, еднакви шанси за сите, поддршка за послабите, чист воздух за сите граѓани и отчетност во трошењето на јавните ресурси.

„Патриотизам е да се бориш за чист воздух, а не да палиш депонии. Патриотизам е да помагаш на послабите, а не да трошиш од државните ресурси за себе. Патриотизам е да си го средиме сопствениот двор, сопствениот дом, да се грижиме за заедничкото – оти заедничкото е и ваше и наше, и твое и мое.“

Претседателот на СДСМ подвлече дека социјалдемократската идеја била и останала двигател на најважните државни одлуки и историски моменти: Во 1991 и 2001, СДСМ ја сочува државата од војна, ги изгради институциите од нула, ја зголеми минималната плата од 9.000 на 25.000 денари, го зајакна социјалниот систем и вложуваше во граѓаните и го донесе членството во НАТО.

„Сè што имаме – институции, плати, социјална помош, НАТО – не ни беше подарено. Сè е изборено, со многу мака и отпор.“

Во финалниот дел од обраќањето, Венко Филипче ја упати пораката што СДСМ ќе ја носи и во наредниот период – повик за нова, обединета борба:

„Ако 1991 се изборивме за независност, сега треба да се избориме за иднина.“

Филипче потсети дека патот кон Европската Унија не е само геополитички избор, туку обврска кон граѓаните кои сакаат стабилност, правна држава, повисоки стандарди и модерна економија.

„Денес сме на чекор од Европа. Тој чекор мора да го направиме сами, но заедно и обединето. Бидејќи јас верувам дека сите на крајот го сакаме истото – сигурна иднина на оваа држава и на нашите деца“, заврши Филипче.

Градоначалникот на општина Центар, Горан Герасимовски упати честитка до сите граѓани по повод 34 години од прогласувањето на незавноста на Македонија.

„На денешен ден, 8 Септември, со гордост се потсетуваме на историската одлука на нашиот народ, да зачекори на патот на слободата и самостојноста, да ја зацврсти својата државност и да ја испише најсветлата страница во современата историја на Македонија.

Овој ден е потсетник дека независноста е вечен аманет од нашите предци, наше е да ја чуваме татковината, да ја развиваме државата и да ја предаваме посилна и поуспешна на идните генерации.

Во време на предизвици, потребни ни се сплотеност, солидарност и меѓусебно разбирање. Само така можеме да изградиме општество во кое ќе владеат доверба, еднаквост и почит, држава во која секој граѓанин ќе се чувствува достоинствено и сигурно.

Да продолжиме заеднички да го остваруваме сонот на генерациите пред нас – Македонија како современа, праведна и европска држава.

Нека ни е честит 8 Септември, Денот на независноста!“, истакнува Герасимовски.

Актуелниот кандидат за градоначалник на Чаир и поранешен министер за надворешни работи, Бујар Османи, утрово со видео порака им го честиташе 8 Септември, Денот на независноста на граѓаните на Република Северна Македонија.

Во своето обраќање Османи потсети на визијата, храброста и истрајноста на генерациите кои ја трасираа патеката кон независна и слободна држава, нагласувајќи дека денешната генерација има должност да ја продолжи таа борба со уште поголема одлучност.

„Нашата држава помина низ многу искушенија, но секогаш кога иднината изгледаше неизвесна, граѓаните избираа достоинство, демократија и европска иднина“, порача Османи.

Тој подвлече дека во овие историски моменти на државата ѝ е потребно повеќе единство од кога било, јасна насока и политичка одлучност:

„Ова не е време за поделби, ова е време за сплотеност и градење мостови. Нашата насока е Европа, а тоа е последниот чекор кој ќе ни гарантира безбедна, развиена и просперитетна држава“.

Османи потсети дека како дипломат и политичар бил дел од клучните процеси на евроатлантската интеграција, но најмногу како човек кој верува во заедничка иднина.

„На овој ден да си дадеме збор: нема да дозволиме никој да не врати назад. Ќе продолжиме напред, со гордост, со разум и со волја, за подобра држава за сите граѓани“, порача Османи во своето обраќање.

На крајот, тој им го честиташе празникот на сите граѓани со силна порака на единство, надеж и посветеност на европската иднина.