Лидерите на најголемите политички партии денеска на средба ги усогласија ставовите околу законите за Собрание, за финансирање на политичките партии, за државна администрација и околу употребата на албанскиот јазик во институциите, согласно насоките кои вчера ни ги достави еврокомесарот Оли Рен.

Премиерот и претседател на ВМРО-ДПМНЕ Никола Груевски, претседателот на СДСМ Бранко Црвенковски и лидерите на ДУИ и Нова демократија, Али Ахмети и Имер Селмани на лидерската средба разговараа околу евроатланската интеграција на државата и исполнување на обврските за добивање на позитивен извештај од Европската комисија на есен.На средбата, која што, како што оценуваат учесниците, поминала во конструктивна атмосфера, Груевски го прифатил барањето на СДСМ, Собранието наскоро да расправа и за измени во Деловникот за работата на парламентот и покрај тоа што тоа не е дел од европската агенда.„Со главната опозициска партија се согласивме, иако тоа не е барање од Европската Унија, да се направат измени на Деловникот според препораките у забелешките на Венецијанската комисија“, изјави Груевски.Договорот е народните избраници да изгласаат заклучок со кој ќе се обврзат три месеци од донесувањето на Законот за собрание да се отвори собраниска расправа и за измена на Деловникот, но исклучиво според препораките на Венецијанската комисија. Претходно, СДСМ имаше свои барања и амандмани за измена на деловникот, но во името на конструктивноста се откажуваат од нив.„За нас е недозволиво да истекува 4-та година по ред како државата има кандидатски статус, а да не ги имаме исполнето критериумите и условите за почеток на преговорите со Унијата. Се наоѓаме во трка со времето, па СДСМ во овој период ќе постапува крајно конструктивно за доброто на државата“, рече Црвенковски по завршувањето на средбата.Власта ги прифатила и барањата на опозицијата со Собранискиот канал да раководи потпретседателот на Собранието избран од редот на опозициските парламентарни партии.Во однос на забелешките за Нова демократија, но и на еврокомесарот Рен за до имплементирање на Охридскиот рамковен договор, лидерите се договориле за целосно исполнување на принципите на правична застапеност на Албанците при вработување во институциите на државата и на локалната самоуправа.„Беа искажани заеднички заложби на сите политички партии за целосна имплементација на духот на Рамковниот договор“, изјави Џевад Адеми од ДУИ.За употребата на албанскиот јазик како службен во Собранието решено е да се формира експертско собраниско тело кое ќе изготви извештај за употребата на албанскиот јазик согласно Законот за употреба на јазиците и Законот за собрание. Одбиено е барањето на Селмани да се прави проширување на обемот на употреба на јазикот надвор од Законот за употреба на јазиците, туку власта прифатила само доимплементирање на Законот з аупотреба на јазиците. Селмани се согласил дека ако експертското тело ги даде потребните резултати ќе се откаже од амандманите на Законот за собрание кои се однесуваат токму на овој дел.Лидерите се согласиле наскоро да се усогласат ставовите и околу измените на Законот за државни службеници, при што Владата ќе ги има пред вис забелешките на опозицијата. Се очекува овој закон да се најде во собраниска процедура кон крајот на август.За да ја постигнат динамиката т.е. во рок од 50 дена до 15 септември кога Европската унија го изготвува извештајот за напредокот на државата во евроинтеграциите, најверојатно ќе биде скратен годишниот одмор на пратениците.На лидерската средба, и покрај тоа што беше поканет  не се појави лидерот на ДПА – Мендух Тачи. Тој во отворено писмо до Груевски денеска ги образложи причините за своето недоаѓање. Тачи се пожали дека лидерските средби биле неефикасни, дека на дневен ред никогаш не биле ставани точки кои се од важност за Албанците. Претседателот на ДПА го обвините премиерот дека го нарушува принципот на секуларност со изградбата на црква на плоштадот и за проширување на Рамковниот договор.„Го прочитав писмото и кога станува збор за таков стил и таков вокабулар, што во последно време може да се чуе од него и од Љубе Бошковски, не сакам да коментирам. Тоа повеќе говори за нив, отколку за мене. Во секој случај жал ми е што не дојде денеска“, одговори Груевски.Нов член на лидерските средби е Селмани, чие појавување власта го објасни со тоа што знаеле дека Тачи нема да се појави, па го поканиле лидерот на Нова демократија за да има релевантна опозициска албанска партија на состанокот.„Гласовите на последните избори покажаа. Тие 150 илјади гласови се релевантни, а релевантна е и пратеничката група која ја имаме“, се одбрани Селмани.На средбата отчет даваа и вицепремиерот за европски прашања Васко Наумовски и министерот за надворешни работи Антонио Милошоски за тоа како поминале средбите со Рен, а дојде и претседателот на собранието Трајко Вељаноски како гаранција за носењето на договорените закони.