СДС повторно бесрамно лаже за пожарот кој се случи во текот на вчерашниот ден во Чучер Сандево. СДС беше власт 7 години и наместо да се позанимава со набавка на возила, модернизација или пак да покрене некаков чекор за борбата со огнените стихии, тие гледаа од каде тендер да наместат и да ќарат провизии, реагираат од ВМРО-ДПМНЕ на обвинувањата од СДСМ.

За разлика од порано кога државата во летните периоди беше во пламен, велат од ВМРО-ДПМНЕ, сега се реагира веднаш.

Од партијата информираат дека 38 возила се ставени во употреба за гаснење на пожарите и дека Македонија за прв пат со оваа Влада добива интервентна пожарна со 50 специјализирани возила за гаснење на шумски пожари, кои имаат одлични карактеристики и капацитети за справување со тешко достапни терени.

„Армиските и полициските возила се пренаменети и ставени на располагање на Владата и на Дирекцијата за заштита и спасување со цел зголемување на капацитетите за справување со пожарите во земјава. Со пренамена на полициски и армиски возила државата заштедува неколку десетици милиони евра, а се зголемуваат капацитетите за гаснење на пожари. На располагање се и по два полициски и армиски хеликоптери кои се подготвени доколку има поголеми пожари и огнени стихии. По 400 евра за 400 невработени се предвидени за сезонски работници за борбата со пожарите низ државата. Имаме план, Македонија ќе ги зачува белите дробови“, пишува во реакцијата.

Градоначалникот на општина Центар, Горан Герасимовски оствари средби со жители на познатото центарско маало, Буњаковец во рамки на проектот „Се гледаме во маало“. Жителите се задоволни од грижата за образовниот процес, а се гордеат со ООУ „Киро Глигоров“ едно од најсовремените во нашата држава.

Пред година дена е завршено проширувањето на градбата и капацитетите на училниците на OOУ „Коле Неделковски“, a следна инвестиција е во „Јохан Хајнрих Песталоци“.

Родителите се интересираа за згрижување на децата за време на летните месеци.

„Во делот на летното згрижување им излегуваме во пресрет на родителите кои што не можат да отсуствуваат од работа за да ги чуваат своите деца. Дечињата од прво до трето одделение кои што се до 10-годишна возраст ги згрижуваме во нашите градинки, а планираме да ги згрижуваме учениците и до четврто одделение.Недостасува наставен кадар, но верувам дека ќе добиеме согласност и од Министерството за образование за да ги задоволиме и овие потреби на родителите но и на децата“, вели Герасимовси.

Буњаковец е урбана и модерна средина, она што е проблем е бетонизацијата, но и покрај новите градби се инвестира во зеленилото.Се разгледува можноста, вети градоначалникот за изградба на нов спортски терен и за решавање на проблемот со движење на пешаците и велосипедистите.

Општина Центар работи на зголемуваме на капацитетите за паркирање а се планираат нови паркинзи до Песталоци, подземно надземна гаража со што ќе се ослободат тротоарите за пешаци и велосипедисти. Проблем е и сместување на најмладите во градинките, велат од Општината.

„Правиме се од себе и инвестираме многу, реконструирани се сите клонови и градинки низ општината и слободно можам да кажам дека имаме најдобри услови вклучувајќи го и персоналот и кадарот кој што се грижи за децата“, вели Герасимовски.

За пожарот којшто во неделата околу пладне изби покрај магистралниот пат кој од Скопје води кон граничниот премин Блаце, се појавуваат нови индиции дека е подметнат, вели директорот на Дирекцијата за заштита и спасување, Стојанче Ангелов.

„Најпрво, на местото на избувнувањето на овој пожар можев да видам дека линијата на огнот е многу широка како за пожар кој би се појавил од фрлен отпушок од цигара. Денеска утрово, додека пожарникарите работеа на негово догаснување, најдоа на неколку места дрвени палети, претходно најверојатно намачкани или прелиени со бензин и фрлени во смреки. Некој намерно утрово се обидуваше да го реактивира овој пожар, којшто е под контрола“, кажа Ангелов.

Тој апелираше до граѓаните доколку забележат сомнително однесување веднаш да пријават на бројот 112.

Ангелов кажа дека ниту еден манастир или црква не биле во непосредна опасност во вчерашниот пожар, ниту пак дека изгореле три куќи од село Чучер.