Четирите женски новородени близнаци, што завчера на свет ги донесе родилката Сибела Цамовиќ беа причина министерот за труд и социјална политика Џељаљ Бајрами денеска да ги посети во Гинеколошко-акушерската болница Чаир

Минисерот Бајрами на мајката и врачи еднократна парична помош во износ од 15.000 денари. „Сите девојчиња за среќа  се живи и здрави и се во добра здравствена состојба,  исто како и мајката“, изјави по посетата министерот Бајрами. Според Законот за заштита на децата, во наредните 15 години родителите на четворката ќе добиваат 70 проценти од просечно исплатената плата во државата на крајот на минатата година, ги информираше минисерот Бајрами. „Бидејќи се работи за многу редок случај, односно многу ретко се раѓаат четворки, ги известив родителите дека потребната документација за родителскиот додаток и потребното решение ќе ги изготват службите на Министерството за труд и социјална политика“, рече Бајрами.Министерот за труд информира и дека поголемиот дел од тие што аплицирале за родителски додаток согласно  Законот за заштита на децата веќе користат таков додаток. Законот предвидува да се аплицира во рок од три месеци по раѓање на децата и за помалку од недела им се остварува тоа право, тврди Бајрами. Добрата здравствена состојба на новородените четири бебиња ја потврди и примариус д-р  Весна Веловска – Стојкова – началник на одделението за новородени во Гинекологијата Чаир.„Сите недоносени новородени четири бебиња се во сосема добра општа состојба. Презадоволни сме и пресреќни. Успех беше што за цело време бременоста беше водена во Гинекологијата Чаир од  еден од помладите специјалисти. Најголем успех ќе биде кога ќе ги испишеме дома сите здрави и среќни“, изјави Веловска – Стојкова. Таа истакна дека во Гинекологијата Чаир ова е прва четворка зачната по природен пат, а во целата држава е втора или трета. Според Веловска Стојкова, четворка се раѓа еднаш во 731 илјада породувања.  Четирите девојчиња, родени во четвртокот напладне со царски рез, се први деца на 24-годишната Цамовиќ, која работи како медицинска сестра на детското одделение во болницата Чаир.