Во следниот мандат ќе обезбедиме уште повеќе пари кај граѓаните за уште подобар економски стандард, вети лидерот на СДСМ, Зоран Заев.

„Уште во првите 100 дена од мандатот ја зголемивме минималната плата и тоа за сите сектори без да има дискриминирани работници како што беа тоа вработените во кожарската, чевларската и текстилната индустрија. Денес и по сите противења на ВМРО-ДПМНЕ минималната плата изнесува 14.500 денари. До крајот на новиот мандат ја носиме на 20.000 денари, односно дури за 120 отсто повеќе од минималната плата од 9.000 денари во времето на ВМРО-ДПМНЕ“, рече Заев.

Во овие 3 години, кажа тој, пораснала и просечната плата, а дека крајна цел на СДСМ е просечна плата од 34.000 денари до крајот на мандатот ако ја освојат власта.

„Ја исправивме и неправдата кон стечајните работници. Денес, 12.000 наши сограѓани добиваат по 8.000 денари месечен надоместок, а во следниот период добиваат и домашна платежна картичка од 9.000 денари. Додека многумина не веруваа, а ВМРО-ДПМНЕ силно се противеше, ја воведовме и спроведовме најсериозната и најраспространета мерка со која за првпат државата враќа пари директно на сметките на граѓаните. Со Мој ДДВ за само три квартали вративме 10,7 милиони евра кон граѓаните. Овој проект продолжува и е уште подобар затоа што лимитот го зголемуваме од 600 на 800 денари месечно, од 7.200 на 9.600 денари годишно по корисник“, рече Заев.

Со концептот парите кај граѓаните, додаде тој, не застанавме ниту кога се соочуваме со здравствена и економска криза. Напротив, рече Заев, продолживме да го реализираме уште подобро и уште повеќе.

„Со домашните платежни картички и со ваучерот за туризам кон повеќе од 324.000 граѓани граѓаните вративме 28 милиони евра за купување на наши, македонски производи и услуги, за посета на наши, домашни туристички центри и објекти. Во следниот период, покрај стечајните работници, домашна платежна картичка од 9.000 денари добиваат и пензионерите со пензии пониски од 15.000 денари, лицата кои се пасивни баратели на работа и самохраните родители“, рече Заев.

Вкупно 137 лица позитивни на коронавирус се пријавиле за гласање на предвремените парламентарни избори, а Државната изборна комисија добила пријави за гласање и од 3.138 болни и немоќни лица.

Оваа состојба е заклучно со вчерашниот ден, а пријавувањето е отворено до вечерва на полноќ. Тие ќе може да гласаат дома, а за нив ќе бодат формирани посебни тимови во кои ќе има и здравствени работници.

Од Државната изборна комисија известија дека од вкупно 300 здравствени работници, кои треба да бидат вклучени во изборниот процес, добиле 100 барања за изземање од разни причини. Барањата им се прифатени на 80 здравствени работници.

„Имаме мал проблем за изборот на здравствените работници. Од веќе избраните, 80 донесоа медицинска или друга документација со која потврдуваат дека не може да учествуваат во изборниот процес. Сега пак ќе ги менуваме, ќе избереме нови по случаен избор“, велат од ДИК.

Изземените здравствени работници донеле документација за хронични болести, некои биле пензионери, а меѓу избраните имало и такви што не може да се најдат на пријавените адреси. ДИК работи на собирање податоци за пополнување на тимовите.

„Денеска сме овде во Гевгелија. Денеска е ден во кој ќе ги посетиме не само Гевгелија, туку и Дојран, Богданци, Валандово. Ќе разговараме со граѓаните во овие градови, ќе разговараме и со стопанствениците, со луѓето што го живеат ова секојдневие во Македонија. Сакаме практично да ја презентираме нашата програма, сите оние проекти што се наменети за овој крај, но и наменети, генерално, за целата држава во следниот 4-годишен мандат на владата предводена од ВМРО-ДПМНЕ“, изјави лидерот на ВМРО-ДПМНЕ, Христијан Мицкоски.

„Цениме дека ништо не е направено за овој крај изминативе повеќе од 3 години, цениме дека овој крај е исто така жртва на погрешните политики на ова раководство на СДСМ предводено до Зоран Заев. Од ветувањата што беа давани во минатото апсолутно ништо не се испорача. Тука, пред сè, мислам на ветувањата дадени за време на предвремените парламентарни избори во 2016 година, а потоа и на локалните во 2017 година. Овој народ заслужува повеќе и ние цениме дека дојде времето кога овие политички измамници ќе бидат поразени со една голема и убедлива победа на коалицијата што ја предводи ВМРО-ДПМНЕ“, додаде тој.