Бигорскиот манастир ќе биде домаќин на свечените Божикни празнувања кои започнуваат утре наутро, со благослов на епископот Антаниски г. Партениј, игумен на Свештената бигорска Обител. Од манастирот ги покануваат сите верници кои сакаат да го прослават светлото Рождество Христово да им се придружат на богослужбите и празничните активности.

„Со радост ги повикуваме сите верници да го прослават светлото Рождество Христово во нашата свештена Обител. Ова е време на заедништво, молитва и духовна радост, каде што секој е добредојден“, соопштија од Бигорскиот манастир.

Утре, во 7:30 часот, ќе започне Божествената литургија во чест на Светиот отец наш Наум Охридски, а вечерната богослужба е закажана за 16:00 часот. Понеделничките активности започнуваат со утрена богослужба во 6:30 часот, следена од царските часови за Рождество Христово во 7:30 часот, и завршуваат со голема вечерна богослужба и Света Василиева литургија во 9:30 часот.

Во предвечерието на големиот празник, од 18:00 до 19:30 часот, ќе се организира Бадникова закуска проследена со традиционалното пеење на божикни каланди. Празнувањето ќе продолжи со сеноќно бдение кое започнува во 21:00 часот. На бдението, кое ќе вклучи големо повечерие со литиски и стиховни, утрена и Божествена Василева литургија, ќе чиноначалствува владиката Партениј.

„Празничните богослужби се можност за духовно зближување и радост во чест на Рождеството Христово. Ги покануваме сите да бидат дел од оваа голема духовна прослава“, додаваат од манастирот.

Божикните активности во Бигорскиот манастир ветуваат свечена атмосфера исполнета со молитва, духовно единство и традиционални обичаи, кои го одбележуваат значењето на овој голем христијански празник.

Општина Центар информира дека реконструкцијата на спортската сала „Работнички“ во Градскиот парк се одвива во полн ек. Посочуваат дека изминатата недела е демонтиран кровот и ќе се постави нов кров и нова фасада.

„Во првата фаза до месец март планираме да поставиме нов кров и фасада, како и комплетно реновирање на канцелариските простории кадешто беа сместени спортските федерации. Новитет е тоа што ќе го прошириме теренот, ќе се постави нова еластична подлога и подно греење, а целиот простор ќе се климатизира. Ќе бидат поставени нови инсталации за електрична енергија, современо осветлување и водовод. Наместо досегашните бетонски клупи ќе поставиме 891 седиште“, информира градоначалникот на Општина Центар, Горан Герасимовски.

Градоначалникот на Центар истакнува дека култната сала, која е симболот на Скопје, ќе биде реконструирана според највисоки стандарди за квалитет и согласно стандардите и процедурите на ФИБА.

Спортската сала Работнички ќе биде енергетски ефикасна со што, како што наведуваат од Општината, значително ќе се намалат трошоците за енергија.

„Го враќаме сјајот на Работнички, покрај реконструкцијата на гледалиштето, предвидено е и обновување на туш кабините, поставување нова опрема, кошови и друга потребна инфраструктура“, вели Герасимовски.

Салата Работнички се реконструира за првпат по 50 години.

Градоначалникот на општина Гази Баба, Бобан Стефковски преку социјалните мрежи инфоримраше дека поради снегот службите на локалната самоуправа делуваат на терен.

„Ноќва во 03:00 часот ме информираа дека на делови во општината има врнежи од снег по што ги задолжив екипите да излезат и да делуваат на терен. Веќе три часа во тек се активности за расчистување на снегот од улиците во планинскиот дел на општина Гази Баба. Сол и ризла се фрлени на пристапните улици до Раштак, Булачани, Црешево, Смилковци, Виниче, Страчинци и Брњарци. Едноставно, сите утврдени кризни точки се опфатени! Безбедноста на граѓаните е наш приоритет! Кризниот штаб ќе продолжи да делува на терен се додека тоа е потребно“, напиша Стефковски.