Македонија
Системот за спречување перење пари значително зајакнат

“Зајакнување на капацитетите за спречување перење пари – фаза 2” беше организиран во рамките на CARDS програмата и потроши 1,5 милиони евра од европските развојни фондови
Проектот “Зајакнување на капацитетите за спречување перење пари – фаза 2″ денеска имаше своја соодветна завршница, на која, на свечен начин, беше презентирано сé она што е сработено во измината година ипол во издигнување на македонските институции на потребното ниво во оваа постојана борба со финансискиот аспект на организираниот криминал.”Овој проект покажа дека инструментите на Европска Унија успешно помагаат во градењето на капацитетите, а со тоа и на целиот систем за спречување перење пари – рече на почетокот од свеченоста Ване Цветанов, директор на Управата за спречување перење пари и финансирање тероризам. – Тој ни помогна во анализата на системот за спречување на перење пари, со што ги пронајдовме неговите слабости за да ги отстраниме и да ја подготвиме Националната стратегија, каде конкретно е опишан целиот систем и подготвен е Акционен план за зајакнување на целиот систем за спречување на перење пари. Со тоа добивме конкретна помош за имплементација на европските стандарди во работата на нашите институции”Инаку, во времетраењето на овој проект се одржани 75 најразлични форми и содржини на настани, а со неговото завршување обучени се над 400 лица од различни институции и субјекти што се поврзани во борбата против перењето пари и финансирање на тероризмот.Овој проект беше организиран во рамките на CARDS програмата и потроши 1,5 милиони евра од европските развојни фондови.Искуствата од овој проект не останаа во салите за состаноци или на хартија, беше речено на свеченоста, речиси сите веќе активно функционираат во надлежните македонски институции.”Со бескомпромисната борба против криминалот ја покажуваме нашата подготвност и волја за што побрзо вклучување на Македонија во европското семејство” – рече на крајот Ване Цветанов.Во својот поздравен говор Ерван Фуере, амбасадорот на ЕУ во Македонија, го изрази своето лично задоволство, но ги пренесе и признанијата и честитките од Комисијата во Брисел за успешното завршување на проектот.Оваа свеченост со своето присисутво ја удостоија и Мариа Ангелес Гарсиа де Лара, Конзул на Кралството Шпанија во Македонија, Хозе Мариа Лабеага, генерален директор на Институтот за фискални студии на Шпанија, како и Гонзало Гомез де Лињо Поло, раководител на студии во Институтот за фискални студии на Шпанија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Карајанова-Димитрушева: Град Скопје мора да биде гарант дека лицата со попреченост нема да бидат оставени сами пред бирократијата

Носителката на листата за советници во Град Скопје од Коалицијата за зелена иднина, Ана Карајанова Димитрушева, најавува конкретни мерки за пристапни здравствени услуги и системска поддршка за лица со хронични состојби во главниот град.
„Како личност која долго се бори со хронична болест, знам дека вистинската грижа значи достапни услуги, предвидливи процедури и пристап до помош кога е потребна. Ќе инсистирам на воспоставување брзи канали за пристап до специјалисти и мобилни тимови за поддршка“, истакнува Карајанова Димитрушева.
Таа најавува и проактивна улога на градот во превенцијата и рехабилитацијата.
„Град Скопје ќе финансира редовни превентивни прегледи, психосоцијална поддршка и програми за рехабилитација. Градот мора да биде гарант дека пациентите нема да бидат оставени сами пред бирократијата“, порачува Карајанова Димитрушева.
Карајанова Димитрушева додава дека не станува збор за милост, тука за основно човеково право.
„За достоинство. Ќе создадеме мрежа за поддршка што ја разбира реалноста на животот со хронични состојби“, порачува Карајанова Димитрушева, притоа упатувајќи повик до граѓаните ако сакаат грижата да стане дел од локалната политика да го заокружат бројот 8 на гласачкото ливче.
Македонија
Андоновски: Македонија добива современ и сеопфатен план за дигитален развој

Министерот за дигитална трансформација, Стефан Андоновски, денеска ја претстави новата Национална стратегија за информатичко-комуникациски технологии – „СМАРТ/МК 2030“, со што, како што кажа, Македонија, по осум години, конечно добива современ и сеопфатен план за дигитален развој.
„Овој документ претставува патоказ за тоа како нашата држава ќе ја оствари својата дигитална иднина – усогласена со европските вредности и стандарди за Дигитална декада 2030, но и македонската визија и потреби“, истакна министерот Андоновски.
„СМАРТ/МК 2030“ е национален документ, дел од поширока европска дигитална агенда за развој. Како земја кандидат, Македонија ја прифаќа рамката на Европската дигитална декада, која предвидува четири цели до 2030 година: дигитално обучени граѓани и квалификувани ИКТ експерти, безбедна и поврзана инфраструктура, дигитализирани јавни услуги и дигитално интегрирани бизниси.
„Нашата стратегија директно ги следи овие европски приоритети. Таа ја зајакнува институционалната конвергенција со земјите членки, создава можности за учество во европските дигитални програми, и овозможува пристап до финансиски инструменти и техничка помош од Европската Унија. Со неа, стануваме активен дел од Европската дигитална заедница – како партнер што придонесува со сопствени знаења, решенија и иновации“, рече министерот Андоновски.
Додаде дека оваа стратегија е резултат на широк и инклузивен процес. Се одржаа десетици јавни расправи и online консултации. Во нејзината подготовка беа вклучени над 300 експерти, институции, стопански комори, невладини организации, универзитети и претставници од ИКТ индустријата.
„Секоја препорака, секоја мерка и секој приоритет произлегува од заеднички консензус – како да изградиме дигитална Македонија што ги обединува сите општествени сектори“, рече Андоновски.
Македонија
ЕУ ја одобри втората транша средства за Македонија во рамките на инструментот за реформи и раст за Западен Балкан

Со одлука за спроведување на Европската комисија, Европската Унија го одобри второто ослободување средства за Република Северна Македонија во рамките на Инструментот за реформи и раст за Западен Балкан, соопшти Министерството за европски прашања.
Со оваа одлука, како што е појаснето, се одобрува вкупен нето-износ од 16 милиони евра како комбинирана поддршка: дел неповратни средства и дел заем.
Од овој износ, 7,4 милиони евра се исплаќаат директно во државниот буџет, а остатокот е наменет за финансирање инфраструктурни проекти преку Инвестициската рамка за Западен Балкан (WBIF).
Вкупниот износ е утврден по одземањето на средствата што се користат за порамнување на претфинасирањето, односно на авансно исплатените средства во рамките на Инструментот.
Одлуката, се истакнува во информацијата, која претставува признание за реформите што Владата ги спроведе во насока на усогласување со стандардите на Унијата, следува по позитивната оценка на Европската комисија за барањето доставено од министерот за европски прашања, Орхан Муртезани, како национален координатор за Инструментот за реформи и раст.
Комисијата утврди дека Северна Македонија ги исполнува предусловите и општите услови за ослободување на средствата, кои се однесуваат на демократското владеење, владеењето на правото, макроекономската стабилност и управувањето со јавните финансии.
Со оценката на Европската комисија се опфатени чекорите од реформската агенда 2024 – 2027, со рок на реализација до јуни 2025 година.
Од вкупно 16 чекори, Република Северна Македонија пријави како исполнети девет врз основа на процената направени од надлежните институции. Европската комисија во рамките на сопствената техничка процена оцени дека четири од овие чекори се задоволително исполнети: три од областа на дигитализацијата и еден во делот на деловната средина, кој се однесува на инспекциските надзори.
Реализираните активности се однесуваат на усвојување нов закон за безбедност на мрежи и информациски системи, усогласен со европската директива за сајбер-безбедност (NIS2), на нов закон за електронски документи, електронска идентификација и доверливи услуги, со кој се воведува европскиот дигитален идентитет, како и на закон за архивски материјал, со кој се воспоставува рамка за електронско архивирање во јавната администрација. Дополнително, Комисијата потврди значителен напредок во борбата против неформалната економија преку зголемен број инспекции од страна на трудовата и пазарната инспекција.
За чекорите што не се целосно реализирани Европската комисија утврди продолжен рок (грејс-период) за нивна имплементација до јуни 2026 година.