Пратеничките групи на политичките партии во Собранието, денеска потврдија дека ќе го поддржат законот со кој со одлука на Владата ќе се избрише црвената петокрака од државниот грб на Македонија

Сите пратенички групи и оние од власта и оние од опозицијата се изјаснија за поддршка на менувањето на државниот грб што го предложи Владата на вчерашната седница, освен пратеничката група на Нова Демократија на Имер Селмани.

„Ние како Нова демократија би предложиле промена на грбот, но доколку тоа ја одразува мултиетничноста на државата. Не сме за козметички измени“, рече пратеникот Сулејман Рушити.

На социјалдемократите им смета единствено што народот, граѓаните не биле вклучени во процесот на менување на државното обележје, пред да биде донесена одлуката на Владата, но најавија поддршка на бришењето на црвената петокрака од државниот грб.

„Ова не е грб на Никола Груевски и на Али Ахмети, ова е грб на Република Македонија, ова е грб на граѓаните на Република Македонија“, рече во Собранието, пратеничката на опозициската СДСМ, Цветанка Иванова.

Од најголемата партија во опозиција очекуваат политички дијалог и јавна дебата при процедурата на носење на законот во Собранието.

Либералните демократи ја поздравија иницијативата за измена на државниот грб затоа што како што рече пратеничката Топузова-Каревска, ЛДП уште минатата година јавно го предлагала истото, од говорница во Собранието.

„Ние сме меѓу последните од земји од социјалистичкиот блок којшто не собравме сили да ја смениме петокраката многу години“, рече Роза Топувова-Каревска.

Од ДУИ сметаат дека е добро што петокраката повеќе нема да биде на државниот грб, но не сакаа да коментираат зошто се откажале од нивните барања од пред неколку години, грбот да ја отсликува мултиетничноста во Македонија.

„Тоа е општоприфтлива и реална состојба во државата, без разлика што можеби не ги отсликува етничките реалности во државата. Наша констатација е дека нема доминантни етнички елементи на која и да е националност во македонската држава“, изјави Сафет Незири, пратеник на владејачката ДУИ.

„ВМРО-ДПМНЕ ќе ја поддржи иницијативата од Владата на Република Македонија во Собранието да се донесе закон со кој ќе се отстрани симболот од претходниот режим, петокраката од државниот грб“, изјави пратеникот од владејачката партија Илија Димовски.

Според Димовски, овој предлог е прифатлив, ненавредлив и рационален предлог до зачленувањето во ЕУ и дека во целост ги задоволува потребите и стандардите.ВМРО- Народна го предлага Земскиот грб од 1620 годинаОд ВМРО-Народна денеска излегоа со предлог за потполно менување на државното обележје, поточно да се замени постоечкиот со земскиот грб од 1620 година. За таа цел, од вторник, ќе почнат со собирање 10.000 граѓански потписи, по што предлог-законот ќе биде доставен и во Собранието. Од партиите во Собранието денеска никој немаше коментар на нивната најава, затоа што велат дека не го виделе предлогот и немаат за што да разговараат. Бидејќи нема нов официјално предложен облик на државниот грб, Топузова-Каревска од ЛДП не сакаше да коментира дали нешто е прифатливо или не.

Според Сафет Незири од ДУИ, партијата ќе следи каква иницијатива ќе има во иднина, а според него постојат експерти, хералдичари, историчари кои ќе се занимаваат со тоа прашање. Како што кажа, Незири, ДУИ е отворена за предлози и нивно разгледување.

Во наредниот период треба да се променат таблите на државните институции, што според ВМРО-ДПМНЕ нема да биде голем трошок за државата. Личните документи на граѓаните, пак, ќе се менуваат по нивното истекување, најави Илија Димовски од ВМРО-ДПМНЕ.