Треба да ги избегнуваме шпекулациите за содржината на извештајот на ЕК за Македонија кој ќе опфати повеќе области во кои е направен прогрес, истакна Фуере

Да причекаме да биде дадена оценката, што ќе се базира на исполнетите критериуми во претходните години. Охрабрувачки е дека е направен голем напредок и уверен сум дека тоа ќе биде забележано. Ова го изјави евроамбасадорот Ерван Фуере, на барање на новинарите да ги коментира медиумските информации за содржината на извештајот што ЕК ќе го објави на 14 октомври и шпекулациите дали ќе има или не препорака за старт на преговорите со ЕУ.„Европската комисија е таа што препорачува или не датум за преговори, а конечната одлука ја носи Советот на ЕУ, кој го има последниот збор“, објасни Фуере пред денешната промоцијата на Документот за водење политики за изградба на интегриран образовен систем. Од прогноза што ќе содржи извештајот се воздржа и вицепремеирот заодлжен за европски прашања Васко Наумовски.„Одлуката дали ќе има препорака или не за почеток на преговори е на Европската комисија. Владата на Република Македонија не е таа што определува дали ќе има препорака или не во мислењата, извештајот и придружните документи на Комисијата. Ние ја очекуваме оценката на Комисијата којашто ќе оцени дали Република Македонија е подготвена да влезе во наредната фаза од нејзиниот пат кон ЕУ, а тоа е преговорите за полноправно членство“, изјави Наумовски.Македонија, како што посочи, е определена и по објавувањето на Извештајот да продолжи со сите оние реформи коишто се нужни за подобрување на состојбите во македонското општество не затоа што тоа Брисел го бара, туку затоа што тоа пред се е нужно за нејзините граѓани.Прашан кој ќе ја преземе одговорноста ако ЕК не даде препорака за старт на преговорите, Наумовски одговори дека тоа ќе бидат тој и неговите соработници задолжени за процесот на евроинтеграција.„Институциите и личностите коишто се занимаваат со евроинтеграцијата, при што не се исклучувам ни себеси, ќе бидат одговорни доколку оваа година Македонија не добие препорака, но и доколку оваа година Македонија добие препорака за почеток на преговорите“, изјави вицепремиерот за европски прашања.Евроамбасадорот Фуере, во тој контекст, пак, посочи дека за прогресот што го постигна Македонија во голема мера е заслужен вицепремиерот Наумовски.