Македонскиот дијалог треба да биде пример и можност да им се помогне на земјите во регионот за градење на заедничко разбирање, порачал пратеникот Владимир Ѓорчев на Медитеранскиот форум на ОБСЕ кој во рамките на есенското заседание на оваа организација се одржува деновиве во Атина.

Македонската делегација во ОБСЕ побарала и понатаму да се стимулираат потенцијалите и да се поддржуваат регионалните иницијативи. Во таа насока, Ѓорчев ги поздрави скорешните изјави на високи европски лидери за европско интегрирање на сите балкански земји и испрати позитивни пораки до новото грчко раководство со надеж дека ќе дејствува во правец на надминување на билатералните прашања.На маргините на состанокот, пратеникот Ѓорчев оствари средби со сенаторот од Охајо, Џорџ Воинивиќ и со претседавачот на Третиот комитет на ПС на ОБСЕ и шеф на шведската делегација Валбурга Хабсбург Даглас.                         На правата сесија за регионалната соработка во енергетскиот сектор настапил пратеникот Андреј Петров. Тој истакнал дека соработката во областа на енергетиката, а особено во се уште ранливите региони каков што е балканскиот, не е само важна туку јасно и недвосмислено покажува колку е таа нужна претпоставка за развој, интеграција и вклучување на регионот во тековите на ЕУ. Петров ги повтори заложбите содржани во Договорот за основање на енергетска заедница за регионална соработка, потпишана во Атина во 2005 година, за формирање на интегриран пазар на електрична енергија и природен гас, како и создавање на правна и регулаторна рамка за пазарот на енергија, кој ќе функционира според правилата применливи во ЕУ, а со цел  целосно интегрирање на регионот во ЕУ. На конференцијата учествуваат околу 200 парламентарци од 56 држави-учеснички во ОБСЕ. Воведни обраќања на денешната конференција имаа: претседател на ПС на ОБСЕ  Жоа Соареш, претседателот на Парламентот на Грција, кој е во заминување Димитриос Сиуфас, како и г. Спирос Куверис, заменик министер за надворешни работи во новата Влада. Според агендата, утре се очекува да настапи Треодорос Пангалос, потпретседател на Владата на Грција и претседател на Политичкиот комитет на Собранието на ЗЕУ.