Македонија
Сите Македонци се за ЕУ и НАТО

Скоро сите македонски граѓани се за влез во ЕУ и НАТО, покажува новото истражување на Меѓународниот републикански институт (ИРИ)
„Расположението меѓу македонските граѓани за членството на Македонија во ЕУ и НАТО е на константно високо ниво со над 90 проценти поддршка за евроатлантската интеграција на земјата“, вели Џон Кевано, директор на Канцеларијата во Скопје на ИРИ во интервјуто за Глас на Америка на македонски.
Институтот неделава треба да го објави најновото истражување на јавното мислење во Македонија.
Според резултатите од истражувањето, македонските граѓани со 94 отсто се за НАТО, а за ЕУ се 96 проценти од населението.
„Нашите анкети покажуваат благо зголемување на песимизмот, почнувајќи од пред шест месеци, но ќе повторам дека веројатно тоа е поради влијанието од глобалната финансиска криза“, изјавил Кевано, кој додава дека граѓаните генерално ја поддржуваат економската политика на актуелната владина коалиција.
Во однос на актуелните контроверзии околу Македонската енцикопедија, Кевано жали за напнатоста што се појави во меѓуетничките односи.
„Се работи за несреќен инцидент во лош тајминг на две недели пред објавување на извештајот на Европската комисија. Се надевам дека македонските и албанските политички лидери и интелектуалци ќе го искористат ова како можност да се обединат и со заемна почит и достоинство да извршат ревизија на Енциклопедијата на прифатлив начин за обете заедници“, вели тој.
Независно од тоа, мнозинството граѓани на Македонија според истражувањето на ИРИ сметаат дека земјата е мирољубива и стабилна и не се нарушени меѓуетничките односи.
Кевано е вечен оптимист и би сакал да види позитивен извештајот на Европската комисија во врска со датумот за почеток на преговори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Коридорот 8 е национален приоритет за Бугарија, велат од бугарското министерство за транспорт

Министерството за транспорт и врски не ја одложи изградбата на пругата кон Република Северна Македонија, се истакнува во информацијата на ова министерство која ја пренесуваат бугарските медиуми.
Министерството за транспорт и врски со години работи на развој на Коридорот 8, кој го поврзува Јадранското Море со Црното Море преку Албанија, Република Северна Македонија и Бугарија, се нагласува во информацијата.
„Од вкупно 1.220 километри железница, повеќе од половина од нејзината должина – 747 километри – е на територијата на Република Бугарија. Од нив останува да се изградат само 2,5 километри железничка пруга – од Гуешево до Деве Баир (границата со Република Северна Македонија)“, информираат од бугарското министерството за транспорт, пренесува БГНЕС.
Делницата, како што велат е финансирана во рамките на Програмата „Транспортно поврзување“ 2021 – 2027 година и ќе биде завршена во планираниот период од 2029 година. За споредба, делот што недостасува од територијата на РСМ е приближно 70 километри.
„Медиумска шпекулација е тврдењето дека нашата земја ја одложи модернизацијата на бугарската делница. Железничката линија Радомир – Ѓуешево е во функција и по завршувањето на делницата од Ѓуешево до Деве Баир долга 2,5 километри ќе може да се приклучи на мрежата на операторот ПЦМ преку прекуграничен тунел. Исто така, NKŽI го нарача дизајнот на рехабилитација на целата делница за брзини до 160 km. Овој проект е финансиран и од Програмата за транспортна поврзаност 2021 – 2027 година.
На 15 јануари 2025 г. согласно утврдената процедура, Бугарија ѝ предаде на Република Северна Македонија нацрт-договор за прекуграничен железнички тунел со Република Северна Македонија, во кој се претпоставува дека страните имаат заедничка цел – изградба на прекуграничен железнички тунел меѓу Република Бугарија и Република Северна Македонија во граничната област, вклучително и преку спроведување на јавна набавка за изградба и надзор на изградбата на тунелот од страна на една од договорните страни и напорите за обезбедување грант помош за негова изградба, бидејќи изградениот објект треба да ги исполнува барањата на ЕУ и НАТО за ваков тип на инфраструктура. До денес нема официјален одговор од РСМ, наведуваат во својот став од бугарското Министерство.
Македонија
ДОМ: Кривична одговорност за еколошката хаварија на Крива Река

Политичката парија ДОМ го повикува Обвинителството да покрене кривична пријава за денешното загадување на Крива Река поради испуштање на енормно количество јаловина со тешки метали и хемикалии од рудникот Тораница и помор на рибниот фонд долж сливот кон Пчиња и Вардар.
Согласно кривичниот закон ваквото загадување на животната средина претставува тешко кривично дело против природата и животната средина каде се предвидени затворски казни над 10 години за одговорните лица во правното лице, оценуваат од партијата.
Министерството за животна средина и Обвинителството, како што велат, треба да ги превземат сите дејствија во нивна надлежност, а не се исклучува можноста согласно Законот за животна средина за одземање на А интегрирана еколошка дозвола на рудникот Тораница поради тоа што ова е трета еколошка хаварија во последните 5-6 години.
Македонија
Ова е победа на правдата: ВМРО-ДПМНЕ ја поздравува одлуката за притвор на Јахоски

ВМРО-ДПМНЕ ја поздравува одлуката на Кривичниот суд за определување на притвор на Асмир Јахоски, Пуцко Петрол. Ова е победа на правдата, се вели во соопштението од оваа партија.
„Само со одлуката за ставање во притвор на Јахоски е единствено исправна и очекувана за криминалот од 160 милиони евра, криминална шема во која еден од обвинетите е во бегство.
Само со исправни одлуки ќе го победиме системот кој мора да го смениме“.
Оваа одлука, според владејачката партија немало да се случи без народот жеден за правда.
„П.С Порака до целата политичко бизнис бандитска исповрзана мрежа:
Заедно со народот жеден за правда ќе ве победиме сите вас кои ја злоупотребувавте државата, сите вас кои ја доведовте Македонија до ова дереџе. Правда ќе има. Ред ќе има“, порачуваат од партијата на Мицкоски.