Услов за пристапување на Македонија во Европската Унија не треба да биде решението за спорот со името, но така би се создала попозитивна средина за продолжуање на процесот на евроинтеграција, оценија денеска евроамбасадорот Ерван Фуере и шведскиот амбасадор Ларс Петер Фреден

Шведското претседателството со Европската Унија ја поздравува добрата оцена на Европската комисија за напредокот на Македонија во евроинтегративните процеси, а сега следат формални чекори во Советот на министери, каде Македонија ќе биде разгледувана заедно со Србија, Босна и Херцеговина, Косово и Албанија, појасни амбасадорот Фреден.

„Ова е златна шанса да се направи поголем напор со цел да се разреши проблемот со името. Сега изгледа дека сликата е многу појасна. Единствените разговори коишто сега остануваат се оние во однос на прашањето за името, а не за одредниците“, рече Фреден на презентацијата на Извештајот на ЕК на собраниската комисија за европски прашања.

Фуере, пак, ја повтори вчерашната изјава на еврокомесарот за проширување Оли Рен од Брисел дека препораката треба да биде силен поттик и охрабрување конечно да се затвори прашањето за името. Пред присутните пратеници, Фуере ги истакна најпрво слабостите забележани во Извештајот, како што се доработувања на реформите во судството, енергетиката, слободниот проток на информации, политичките реформи, социјалниот елемент и други.

Фуере изрази задоволство од позитивните оценки на борбата со корупцијата, азилот, борбата со криминалот, јавните набавки, даночните реформи, индустриското производство, транспортот и друго.

Амбасадорот Фреден рече дека конечната одлука за старт на преговорите ја носи Советот на ЕУ со консензус. Тој информира дека од денеска веќе заседава Комитетот за Западен Балкан при Советот на ЕУ за Извештајот за Македонија, кој треба да му помогне на Советот на 7 и 8 декември да се изјасни за датумот за преговори.

Вицепремиерот Васко Наумовски изрази задоволство од одлуката на Европската комисија, која била фер, а „одличните оценки во судството, антикорупцијата и другите поглавја не’ охрабруваат да продолжиме“, рече Наумовски.

Радмила Шеќеринска од СДСМ рече дека Европската комисја знае да ги оцени напорите, тогаш кога се има аргументи. Таа потсети дека Македонија чекаше четири години на позитивен извештај, за што на некои земји им требаше една, па потсети да не се дозволи преговорите и членството да ги чекаме 20 години, туку да се сработи побрзо.