Македонија сака да се изнајде решение за прашањето околу името. Тоа е можно доколку грчката страна го изоди својот пат, а ние да го изодиме нашиот и да најдеме заедничко решение за спорот што тие го имаат кон нас, истакна во Анкара претседателот Иванов

„Веќе двапати го канам мојот грчки колега, праќам пораки и нагласувам дека мораме преку дијалог да ги решаваме отворените прашања. Можеби ние како претседатели нема да успееме да го решиме проблемот, но тое ќе биде добар сигнал до населението да почувствува дека постои некоја блиска соработка, истакна Иванов. Нашите граѓани одат на летување во Грција, наши студенти учат во Грција, грчките бизнисмени се најголеми инвеститори во Македонија, граѓани на Грција доаѓаат да купуваат кај нас. Тоа значи дека останува исчекорот да го направат политичарите“, рече Иванов. На прашањето што македонската страна презема во насока на надминување на спорот, претседателот Иванов истакна дека македонскиот политички врв прави обиди за да се искористи, како што рече, „позитивната атмосфера во регионот“. „Ние сме постојано во комуникација, со нашиот преговарач, со министерот за надворешни работи, со премиерот, да видиме како можеме да придонесеме кон овој позитивен момент што се создава во регионот. Повторувам дека песимистите на Балканот се оптимисти со искуство. Да не негуваме преголем оптимизам, треба да бидеме реалисти, да очекуваме што е реално можно. Односот кој го покажа грчкиот премиер кон Турција, кој присуствуваше во Истанбул, очекуваме на ист начин да го покажат и кон нас“, истакна претседателот Иванов, забележувајќи дека поранешната министерка за надворешни работи на Грција како претседавач со ОБСЕ, не нашла за сходно да ја посети Македонија.Сепак, Иванов очекува преку интензивна комуникација, последните пораки од регионот, лобирања за Македонија и пријателските совети од одредени структури во Европа, ќе бидат добра можност да се искористи моментот за исчекор напред.„Ќе видиме времето што носи, се надеваме дека нешто ќе се случува во регионот, и можеби тоа ќе придонесе и од наша страна со некој гест на добра волја“, потенцира претседателот Ѓорѓе Иванов.