Македонските иселеници кои живеат и работат во Австралија ќе можат своите стекнати пензии да ги добиваат и во Македонија, доколку се вратат да живеат овде. Ова го предвидува Договорот за социјално осигурување што го потпишаа премиерите Никола Груевски и Кевин Рад во Канбера, јави МИА

„Договорот е важен за решавање на многу важни прашања за македонските државјани кои живеат во Австралија, за австралиските граѓани од македонско потекло, како и за австралиските државјани кои живеат во Република Македонија“, рече премиерот Груевски по потпишувањето и додаде дека тој ќе претставува поттик за интензивирање на контактите меѓу двете земји, што би придонело за потпишување нови билатерални договори, пред се’ од економската сфера. Според австралискиот премиер, од 2011 г., кога треба да почне да се применува Договорот, граѓаните кои поминале дел од својот живот во Австралија и Македонија ќе имаат можност за во двете земји. „Договорот ги одразува блиските врски меѓу луѓето од двете земји со што уште повеќе се продлабочуваат“, рече премиерот Рад.Ова е прв официјален договор што го потпишуваат Македонија и Австралија од воспоставувањето дипломатски односи во 1995 година. Договорот е направен на укажување на иселениците од Австралија, а на неговата подготовка е работено две години. По денешното потпишување ќе следи негова ратификација во парламентите на двете земји.Премиерот Груевски во иднина очекува подинамична соработка меѓу Република Македонија и Австралија на економски план, како и поголемо присуство на австралиски инвеститори во земјата. „Билатералните односи меѓу двете земји ги карактеризира пријателство и меѓусебно разбирање, но постои и голем потенцијал за натамошно унапредување и продлабочување на соработката, особено во економската сфера“, рече премиерот Груевски.Тој ја нагласи и значајната улога што ја има македонската заедница во Австралија која, како што рече, придонесува за збогатување на мултикултурното општество во оваа земја и претставува основа за изградба на цврсти пријателски односи меѓу двете земји. „Иако географски оддалечена граѓаните на Македонија ја чувствуваат пријателска Австралија како блиска, најпрво затоа што Австралија секогаш давала силен придонес за мирот, развојот на демократијата и економскиот просперитет во светот по цена на големи жртви, но и затоа што таа ги отвори вратите за голем број Македонци, кои денес живеат таму и претставуваат голема и интегрирана заедница во австралиското општество“, истакнал премиерот Никола Груевски.Тој беше пречекан со највисоки државнички почести пред Парламентот во Канбера, а на јарболите пред Парламентот и по улиците се вееја македонски знамиња. Во рамки на посетата премиерот Груевски денеска се сретна со претседателот на Претставничкиот дом на Парламентот на Австралија, Хари Џенкинс. Во Канбера, како и во Сиднеј премиерот имаше средба со иселениците од овој регион.