Уставниот суд имал зголемен обем на работа во годината што изминува, што е тренд и во минатите 10 години

Како што информираат од Уставниот суд, бројот на предмети, на оценки на уставноста на законите, бројот на укинати и на поништени противуставни прописи по кој одлучувал судот од година во година се зголемува.Според бројките, презентирани во вторник, бројот на примени предмети во 2009 година изнесувал 280, наспроти 205-те примени во 2002 година. Во годината што изминува, во работа се 415 предмети, наспроти 296-те предмети во 2000 година. Зголемување се бележи и во бројот на оценки на уставноста на законите. Во 2009 година судот укинал 40 закони и нивни одредби од вкупно донесените 65 интервентни одлуки, наспроти 13-те укинати закони и нивни одредби од вкупно 40 интервентни одлуки во 2000 година.„Заклучоците што можат да произлезат од таквите податоци се разновидни и многубројни, што во основа се однесуваат на бројни субјекти и упатуваат на развојот на правната држава и не само на неа. Во основа укажуваат и на степенот на остварувањето на Уставот и неговата заштита“, изјави Трендафил Ивановски, Претседател на Уставниот суд.Ивановски додава дека „со почитување на Уставот се обезбедува правна сигурност, стабилност на системот и неговите институции и се гради доверба во државата“.Уставниот суд, во годината што изминува, одржал 42 седници на кои биле разгледувани вкупно 415 прашања.Од таму информираат и дека за нивната работа има зголемен интерес во медиумите. Во 2009 година се објавени 1.280 информации во медиумите и 521 текстови за работата на судот, што е зголемување во однос на 2008 година, кога биле објавени 440 информации и 270 текстови. Најголем интерес кај новинарите имало за оценувањето на уставноста на верското образование во основните училишта, како и за екстерното оценување на учениците.