Во првата половина од годинава, за време на шпанското претседателство да се реши прашањето за името и Македонија да добие датум за почеток на преговорите за полноправно членство во ЕУ. е заклучокот од денешната средба на министрите за надворешни работи на Македонија и на Словенија во Љубљана

Како што јави известувачот на МИА, словенечкиот министер Самуел Жбогар уште еднаш потврди дека Словенија ќе се обиде да ја поддржи и да и помогне на Македонија за решавање на прашањето за името, кое како што рече ја попречува на нејзиниот пат кон ЕУ и НАТО, иако Македонија е многу активна, а се ште не е полноправна членка на НАТО и ЕУ. „Тоа е прашање кое треба Македонија и Грција да го решат со помош на Обединетите нации. Улогата на Словенија е преку нашите иницијативи и обиди бидејќи ја разбираме ситуацијата. Со нашите разговори со грчките колеги ќе се обидеме да направиме позитивна атмосфера што ќе придонесе за решавање на ова прашање. Словенија не може да го реши ниту може да преземе таква задача, но може да придонесе кон создавање добра атмосфера за полесно решавање на прашањето за време на шпанското претседавање со ЕУ, рече министерот Жбогар одговарајќи на новинарско прашање како Словенија ќе и помогне на Македонија во решавањето на спорот за името со Грција. Министерот Антонио Милошоски изрази очекување дека за време на шпанското претседателство Република Македонија ќе ги оствари заслужените амбиции и ќе напредува во евроатлантските интеграции. Тој информира дека крајот на февруари или почетокот на првата недела од март посредникот Метју Нимиц ќе ги посети Скопје и Атина за да ги слушне размислувањата од двете влади и да ги пренесе своите согледувања во однос на билатералниот спор кој Грција го наметна во врска со уставното име на Република Македонија. Според Милошоски потребен е билатерален дијалог кој Македонците и Грците би го воделе заеднички. Расположени сме, потенцира Милошоски да седнеме на заедничка маса со грчките соседи без разлика дали тоа е Лондон, Атина или Скопје и како Македонци, рече тој, да им објасниме што сметаме дека може да биде одреден напредок по ова прилично апсурдно прашање. „Македонија во однос на грчко-македонскиот спор е подготвена да разговара за компромис во кој секоја од двете засегнати страни би чувствувала  дека има свој удел. И Македонија и Грција да имаат чувство дека разговараат за еден компромис во кој секоја страна може да се препознае и да го смета евентуалното решение како заемно прифатливо и компромисно, рече министерот Милошоски на заедничката прес-конференција со неговиот словенечки колега. За жал, додаде тој, досега од Грција наидуваме само на диктирани позиции и желби кои тие сметаат дека треба да бидат наметнати на Република Македонија што пак подвлече, не придонесува за позначителен напредок во однос на билатералните разговори. Во оваа насока Милошоски изрази надеж дека на средба со алтернативниот министер за надворешни работи на Грција Димитрис Друцас ќе има можност во Лондон да дискутира по ова прашање. Македонскиот шеф на дипломатијата нагласи дека Македонија ќе направи се што е во нејзина моќ да ги увери грчките пријатели, како и сите сојузници и партнери во ЕУ дека процесот на проширување на ЕУ и процесот за напредување на Македонија кон Унијата е заемно полезен за сите, а тоа дополнително ќе ја поттикне и стабилноста и развојот и демократијата и во Македонија и во регионот. „Ако ЕУ по усвојувањето на Лисабонскиот договор сака да биде глобален играч ние тоа го цениме, но за да може да има кредибилитет за тоа, би требало да има капацитет и да демонстрира дека пред се може да биде локален играч. Македонија е дел од локалните прашања на Европа. Дел сме од дворот на ЕУ и сметам дека Унијата има добра шанса во однос на Македонија на еден квалификуван кандидат да покаже дека има капацитет и да не придвижи чекор напред, а со тоа да покаже оти и самиот процес на проширување има суштина и кредибилитет, рече Милошоски,  Тој потсети дека минатата година Македонија заслужено ја доби препораката од Европската комисија да отпочне преговори за членство. Според него тоа беше показател дека Македонија го завршила својот дел од задачите поставени од Брисел. Милошоски изрази очекување сега Брисел да го заврши својот дел и да и овозможи на Македонија да отпочне преговори за полноправно членство во ЕУ иако на тој пат се испречува позицијата на Грција со еден прилично апсурден спор. На новинарско прашање како ги оценува сите иницијативи за медијација во македонско-грчкиот спор Милошоски нагласи оти секоја помош е добредојдена и секој интерес го гледаме добронамерно.„По ова прашање реториката и усните најави дека некој сака да и помогне на Македонија да го реши прашањето не е доволна. Многу политичари досега и европски и регионални се нашле на таа листа на реторички помагачи, но никој не се квалификувал и не стигнал до финалето на македонско-грчкиот спор, одговори македонскиот шеф на дипломатијата употребувајќи во оваа прилика една македонска поговорка во која се вели многу бабици килаво дете. Министрите Милошоски и Жбогар ги потврдија веќе традиционално пријателските добри односи меѓу двете држави и потенцираа дека нема отворени прашања, но има многу можности за зајакнување на соработката  на многу полиња особено стопанската соработка и покрај економската криза. Министерот Милошоски изрази благодарност до Словенија за поддршката за добивање на безвизниот режим за граѓаните на Република Македонија. Тој нагласи дека најголемиот капитал во односите покрај високиот интензитет на политички и економски план е заемната доверба и пријателство што постои меѓу двете земји. Во Љубљана шефот на македонската дипломатија ќе одржи предавање на Меѓународниот институт за блискоисточни и балкански студии на тема „Република Македонија на патот кон ЕУ и НАТО“ во рамки на циклусот насловен како „Западен Балкан и ЕУ“, а за доцна попладне се очекува да биде примен од словенечкиот премиер Борут Пахор.