Македонија
Сите потребни документи само со лична карта

Кога граѓаните во Македонија ќе се обратат до некоја институција ќе треба достават само лична карта, а се друго автоматски ќе им биде генерирано
Интероперабилноста е еден од најзначајните проекти на македонската влада за развој на информатичкото општество, со тоа што се поставува инфраструктура меѓу државните институции. Ова денеска во Скопје го изјави министерот за информатичко општество, Иво Ивановски, на тркалезната маса на тема „Интероперабилностa нуди избор, поттикнува иновации и создава можности“ организирана од Микрософт Македонија. „Интероперабилноста има за цел да ги елиминира дупликатите на базите на податоци, кои што ги имаат државните институции и да воспостави една комуникациска врска и линк каде што институциите кога ќе разменуваат податоци меѓу себе ќе бидат многу поефикасни, потранспаренти и поодговорни пред граѓаните“, рече Ивановски.Тој информираше дека владата уште лани започна со реализација на пилот проект во кој ќе се поврзат неколку државни институции како што е МВР, Царинска управа, Катастарот, Централниот регистер и Управата за јавни приходи.Ивановски најави дека со следниот степен ќе се настојува граѓаните во Македонија кога ќе се обратат до некоја институција да достават само лична карта, а се друго автоматски да им биде генерирано. Генералниот Менаџер на Микрософт Македонија, Илијанчо Гаговски, рече дека интероперабилноста не била случајно одбрана да биде тема на денешниот настан со оглед на тоа што добива огромно значење во последно време.„Светот станува вмрежен, системите на најразлични институции се повеќе имаат можност и потреба да комуницираат меѓу себе. Ако некогаш интероперабилноста беше само пожелна категорија, денес е неопходност”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.