Албанскиот претседател Бамир Топи синоќа во Дебар на посебна свеченост беше прогласен за почесен граѓанин на Дебар, јави дописникот на Макфакс од Дебар

Градоначалникот Аргетим Фида при предавањето на Признанието нагласи дека албанскиот претседател оваа признание го добива заради особени заслуги за неговиот придонес во меѓуграничната соработка и унапредување на односите меѓу народите и државите во регионот.

„Задача на политичарите на Албанија и Македонија е да промовираат само политика на пријателство и добрососедство. Ви гарантирам дека Албанија и Македонија имаат една заедничка иднина а тоа е Брисел„, рече на свеченоста албанскиот претседател Бамир Топи. Тој додаде дека  Албанија е членка на НАТО, но наскоро членка на НАТО ќе стане и Македонија. Македонија пак е чекор пред Албанија кога станува збор за интегрирањето во ЕУ, но и Албанија  оди по тој пат нагласи албанскиот претседател. Сето оваа ќе донесе нова клима во регионот, нови инвестиции и повеќе виталност. Овој регион кој имаше минато со големи трауми  има перспектива, заради тоа треба да бидеме оптимисти и да соработуваме повеќе, истакна Топи. На свеченоста присуствуваа над 300 видни личности од политичкиот, јавниот живот, претставници на верските заедници, делегација од Албанија, претставници на Македонската влада како и амбасадорите на Македонија и Албанија во Тирана и Скопје. Топи по средбата во локалната власт со градоначалникот на Дебар, Аргетим Фида, беше поздравен од страна на граѓаните, а положи и свежо цвеќе на споменикот на Скендербег во Дебар. Пред да пристигне во Дебар, Топи придружуван од заменик премиерот во Владата на Македонија, Абдулаќим Адеми го посети и Манастирот „Свети Јован Бигорски“