Еврокомесарот за проширување Штефан Филе оценувајќи ја состојбата на Балканот и напредокот на земјите од просторот на поранешна Југославија за влез во ЕУ, потенцира дека брзината на реформите зависи, пред се, од домашните политичари

„Европската комисија ги утврдува критериумите и стандардите, останатото е на домашните актери, поточно да ги усвојат и применат. Би ги замолил граѓаните и политичарите на земјите-аспиранти да не мислат дека процесот на придружување односно неговата динамика дека ја контролира Брисел. Тоа во голема мера зависи од домашните актери, додава Филе во интервју за Радио Слободна Европа.Имајќи ја предвид ситуацијата меѓу балканските земји, блокираните односи меѓу Србија и Косово и состојбата во Босна и Херцеговина, Филе изјави дека токму поради тоа НАТО и ЕУ се присутни и инвестираат во Западниот Балкан. „Поради тоа членките на овие две организации се толку силно уверени дека просперитетот и стабилноста на земјите од просторот на поранешна Југославија може да се обезбеди со влезот во НАТО и ЕУ. Заради тоа многу се ангажираме, не само во контактите со политичарите  на Балканот за да се спречат какви било сценарија. Јас сум оптимист, остварен е голем напредок. Хрватска е во завршна фаза на преговорите за членство. Со Поранешната Југословенска Република Македонија чекаме само зелено светло од една земја-членка на Унијата за да ги почнеме преговорите“, изјави еврокомесарот Филе, уште еднаш потенцирајќи дека ова покажува дека за конкретните прашања од интерес за граѓаните, домашните политичари се подготвени заедно да работат.