Македонија
Селмани и Тачи не отидоа кај Иванов

Нова демократија не учествува на средбата кај претседателот Ѓорѓе Иванов.
Одлуката ја донесе Управниот совет на партијата со образложение дека нема да учествуваат на вакви средби се додека, како што соти во партиското соопштение, премиерот и албанскиот партнер во Владата не ги стават на маса темите за решавање на судските случаи како Сопот, Бродец и четирите хашки случаи.Како услов за учество на средби од ваков тип Нова демократија на Имер Селмани бара и прекинување на проектите „со монетнички и моноверски карактер како „Скопје 2014“, спроведување со дадени рокови на обврските кои произлегуваат од Охридскиот рамковен договор и неговиот дух, а кои не се реализирани, како што е Законот за семејствата на борците, инвалидите, цивилните жртви на ОНА од конфликтот во 2001-ва, официјализирање на албанскиот јазик во согласност со амандманот 5 од Уставот, Законот за употреба на симболи итн.Во барањата на Нова демократија е и продолжување на преговорите за гласање по бадентер во Уставниот суд, Републичкиот судски совет и при усвојвување на буџетот на државата.На крајот партијата бара отворање на меѓупартиски и меѓуетнички дијалог и решавање на спорот со името и деблокирање на интегративните процеси.
На средбата што денеска ја свика претседателот Ѓорѓе Иванов, покрај Селмани, не дојде и лидерот на ДПА, Мендух Тачи.
На неформалниот состанок со претседателот, кој е во тек, дојдоа само лидерите на ВМРО-ДПМНЕ, СДСМ и ДУИ, Груевски, Црвенковски и Ахмети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.
Македонија
Задутре времен застој на ГП „Делчево“ заради градежни работи

Регионалниот центар за гранични работи „Исток“ ја информира јавноста дека задутре ГП и ГН „Делчево“, односно од бугарска страна ГКПП „Станке Лисичково“ целосно ќе бидат затворени за секаков сообраќај во периодот од 08:00 до 14:00 часот.
Причина за тоа, според официјалното известување добиено од бугарските гранични полициски служби, се градежните работи на патната делница кај ГКПП „Станке Лисичково“. По завршувањето на работите сообраќајот и функционирањето на граничните премини ќе продолжи непречено да се одвива.
Македонија
Апел за поддршка: Помогнете на ранливите граѓани да аплицираат за субвенција за струја

Инженери на Република Македонија упатија апел до јавноста за помош на ранливите категории граѓани во процесот на аплицирање за финансиска поддршка од Министерството за енергетика. Станува збор за јавен оглас за субвенција од 1.000 денари месечно на сметката за електрична енергија, кој важи 12 месеци.
Апелот е насочен кон инженери, техничари, информатичари и сите граѓани што се снаоѓаат со институционални постапки, да им помогнат на лица со интелектуална или телесна попреченост, целосна слепост или глувост, лица во социјален ризик и сиромаштија, кои се соочуваат со бариери при собирање на документи, пополнување формулари и поднесување на пријави.
Постапката за аплицирање вклучува преземање формулари од www.energy.gov.mk, фотокопирање документи, обезбедување на нотарска изјава и испраќање на пријавата по пошта во затворен плик. Рокот за пријавување е 30 дена од денот на објавата на јавниот оглас.
Според Државниот завод за статистика, над 38.000 домаќинства примаат гарантирана минимална помош, но само околу 4.000 домаќинства ја користат оваа субвенција. Останатите над 90 отсто не аплицираат, најчесто поради технички пречки, а не поради неисполнување на условите.