Министерката за образование и наука Мила Царовска одржа работен состанок со претставници на над 30 граѓански организации и со нив дискутираше за заедничките цели и приоритети и можноста за соработка во реформите на образованието.

„Граѓанските организации се и ќе продолжат да бидат наш важен партнер во сите значајни процеси во општеството, меѓу кои е и образованието. Убедена сум дека поголемиот дел од вас работат, или се вклучени во различни процеси и креирање политики за подобрување и унапредување на образованието и очекувам дека ќе најдеме простор за заедничка соработка“ , рече Царовска.

Претставниците на граѓанските организации најавија дека имаат интерес за соработка со МОН во делот на развој на инклузивно образование, реформите во образованието, вклучувањето на младите во реформите позврзани со квалитна настава и подобрување на младинскиот стандард, како и во обезбедувањето на квалитетни учебници.

Еден од петтемина полицајци од Велес, кои синоќа биле нападнати од дрвокрадци, има тешки телесни повреди. Тој од синоќа е во Клиничкиот центар во Скопје, а денес го посетиле министерот за внатрешни работи, Оливер Спасовски, и директорот на Бирото за јавна безбедност, Сашо Тасевски.

„Нападнатиот полицаец има фрактура на черепот, на коските на лицето и фрактура на подлактницата. Контактибилен е, но во тешка состојба. Ударот на полицаец е удар врз државата“, рече министерот Спасовски, кој очекува набргу сите петмина повредени полицајци да закрепнат и да им се вратат на обврските.

Двајца од нападнатите полицајци синоќа биле пуштени на домашно лекување, двајца се задржани во болницата во Велес, а најтешко повредениот е префрлен во Скопје.

За нападот на полицајците се приведени четворица, а идентификувани биле десетмина, но претресите продолжуваат.

Министерот Спасовски очекува бргу да постапи и Обвинителството.

Тој нагласи дека во Владата, заедно со министерот за правда, Бојан Маричиќ, ќе отворат дебата за да најдат начин да ги демотивираат напаѓачите на полициските службеници.

„Секој што ќе нападне полициски службеник, ќе се соочи со законот. Напад врз полициски службеник е сериозно кривично дело и нема да се толерира“, рече министерот Спасовски и нагласи дека досега нема случај на притворени напаѓачи на полицајци.

Според министерот, нападот на полицајците е одговор на насилниците по зачестените контроли.

Велешките полицајци биле нападнати синоќа во атарот на селото Степанци.

Претседателот на Собранието, Талат Џафери, денеска оствари средба со словенечкиот претседател Борут Пахор.

Како што информираат од неговиот кабинет, Џафери изразил задоволство од одржувањето средба со државник кој доаѓа од пријателска земја и е промотор на нашите евроатлански интеграции.

Особено ја поздравил иницијативата на Пахор за Брдо-Бриони процесот и визијата за стабилизација на регионот преку регионална соработка, како чекор пред негова интеграција во Европската унија.

„Како 30. земја членка на НАТО и земја која очекува формално отпочнување на преговорите за членство во ЕУ, земјата и нејзините институции се подготвени соодветно да одговорат согласно преземените договорни обврски“, заклучил Џафери.

Пахор изразил благодарност за можноста за размена на мислења и за обраќање пред пратениците во македонското Собранието, како израз на пријателство и градење сојузништва особено во тешки и непредвидливи времиња.

Тој ја поздравил државничката мудрост на претходната влада и собраниското мнозинство за надминувањето на сензитивни и тешки билатерални прашања со соседите.

„Република Словенија ќе продолжи да ве поддржува на патот кон полноправно членство во Европската унија и на тој пат не треба да постојат неправедни условувања кои ќе го кочат процесот,“ заклучил словенечкиот претседател.