Политичките притисоци, заканите, нападите и тужбите, влијанието од скриените центри на моќ и одредените бизнис кругови, како и ниските плати во фелата, се само дел од причините кои ја доведоа новинарската професија во Македонија до ниво на записничарство.

Политичките притисоци, заканите, нападите  и тужбите, влијанието од скриените центри на моќ и одредените бизнис кругови, како и ниските плати во фелата, се само дел од причините кои ја доведоа новинарската професија во Македонија до ниво на записничарство. Ова го констатираа дискутантите на денешната дебата за слободата на медиумите во Македонија, долгогодишните новинари: Слободан Чашуле – „Форум“, Никола Младенов од „Фокус“, Исмаил Синани од „Алсат“, Горан Момировски – ЗНМ/Канал 5 и Горан Гавриловски од „Канал 77“. „На крајот на самоуправувањето, кога зеде замав демократизацијата, имавме поголема слобода и поголем професионализам во новинарството во Македонија отколку денес,“ рече Слободан Чашуле кој додаде дека во првите четири години на демократизацијата, во земјата имало медиуми кои со својата работа овозможиле да се завршат многу процеси кои биле во целосен застој на почетокот. „Ретки се медиумите кои успеваат да преживеат самостојно, имаме два три такви во Македонија, кои можат да го преживеат притисокот на власта, на сопственикот и на отуѓените центри на моќ, кој е зад сопствениците или зад медиумите. Во една држава со популација од 2 милиони луѓе ние имаме пет приватни национални телевизиски мрежи. Не е лошо да ги имаме под услов тие да можат да опстанат на пазарот,“ рече тој. Никола Младенов од „Фокус“ истакна дека македонското општество нема некое искуство со слободата и таа е нешто што ние допрва треба да го учиме. „Освен власта кои се другите виновници за ваквата ситуација? Пред се ние, новинарите, што дозволивме да се трампаме за некакви бенефиции со личниот интегритет,“ рече Горан Момировски, новинар и член на извршниот одбор на Здружението на новинари на Р. Македонија. Според него, притисоците од власта врз новинарите не се ништо ново и „ова што се случува сега, се случува во последните 15 години“. „Власта таква каква што е, нема да се откаже од механизмите кои објективно ги има, контролирајќи ги парите кои ги има за реклами, влијанието кај одредени бизнис кругови, кај сопствениците на медиумите, ниту пак сопствениците на медиумите ќе се откажат од државата. Единствен кој може да направи нешто е токму опозицијата. Зошто сега кога ситуацијата е толку многу лоша, не слушнавме од опозицијата предлог за донесување на закон со кој ќе се регулираат трошењето на државните пари во медиумите?“ запраша Момировски. „На некој начин, медиумите, со мали исклучоци, индиректно се столбови на корупцијата на оваа држава. Самите медиуми во повеќето случаеви, посебно во последните 10 години сакаат да бидат жртви на самиот систем и влегуваат во таа замка на власта и на опозицијата која кај нас е сепак на некој начин јака,“ рече Исмаил Синани, заменик главен и одговорен уредник на Алсат телевизија на дебатата која се одржа во организација на Правниот факултет „Јустинијан Први“. Вчера, Фридом хаус во новиот извештај повторно и даде на  Македонија просечна оценка за демократскиот развој, а најлоши беа оцените за ситуацијата со медиумите во земјата. Фридом хаус истакна најголема загриженост за проблемите со независноста на медиумите и притисоците кои се вршат врз новинарската фела. Пред само неколку дена снимател на ТВ Ера беше нападнат од страна на обезбедувањето на премиерот Никола Груевски додека ја вршеше својата професионална задача.