Во вторник во Брисел ќе се одржи седмиот состанок на Советот за стабилизација и асоцијација меѓу Република Македонија и Европската Унија, на кој ќе се разговара за постигнувањата во процесот на пристапување на земјава кон Унијата

Состаноците на Советот за СА, кои се одржуваат еднаш годишно, се од исклучително значење за текот на интеграцијата на нашата земја во ЕУ.  Со оглед на ротирачкото претседателство со Советот за СА, со годинешниот состанок ќе претседава Европската Унија, односно Министерот за надворешни работи на Белгиското претседателство, Стивен Ванакере, а ќе учествува и комесарот Штефан Филе. Копретседавач со Советот за СА од Македонска страна е министерот за надворешни работи, Антонио Милошоски. Во делегацијата на Република Македонија учество ќе земат и вице-премиерот Васко Наумовски и државниот секретар во Секретаријатот за спроведување на рамковниот договор Илхам Исмани. На состанокот на Советот за СА ќе се разговара за постигнувањата на Република Македонија во процесот на пристапување во ЕУ, политичките и економските критериуми, спроведувањето на Спогодбата за стабилизација и асоцијација, финансиската соработка и прилагодувањето кон законодавството на ЕУ. На состанокот ќе бидат разменети мислења и за состојбите во ЕУ од аспект на Спроведувањето на Лисабонскиот договор, стратегијата „Европа 2020“, справувањето со економската криза, а ќе се дискутира и за состојбите на Балканот, придружувањето на Македонија кон Заедничката надворешна и безбедносна политика на ЕУ, како и за други надворешно-политички прашања од заеднички интерес. Советот за стабилизација и асоцијација (Советот за СА) е највисоката институционална структура за билатерален политички дијалог и соработка меѓу Република Македонија и Европската Унија, воспоставена со Спогодбата за стабилизација и асоцијација. Спогодбата за стабилизација и асоцијација стапи во сила на 1 април 2004 година и ја претставува рамката за спроведување на договорните односи се до приемот на Република Македонија во ЕУ.