Застарените и магационирани возила на министерствата за внатрешни работи и одбрана, се прилагодуваат за гасење пожари на непристапен терен. Премиерот Христијан Мицкоски вели дека годинава државата е драматично поподготвена за пожарите во однос на претходните години. Тој кажа дека пожари ќе се гасат како и досега со армиските и полициските хеликоптери како и со авионите на Дирекцијата за заштита и спасување, чие дополнување ќе бидат прилагодените возила кои досега стоеле во магацини.

„Она што ќе биде новитет е дел од застарената и магационирана опрема како што се ’БТР’ 70, 80, старите ’хермелини’, ’пинцгауери’ и слично, кои што беа во магацините на министерствата за одбрана и внатрешни работи се модернизираа, обработија, им се инсталираа посебни резервоари за вода, се купија пумпи кои работат на висок притисок и можат да пристапуваат на непристапни терени. Тие се за тоа што многу ни беше важно, навечер кога огнот, како што велат, спие, да може да му пристапиме и да го изгасиме за да не се распламти преку денот. Се подготвуваат и многу скоро од денеска ќе бидете сведоци на една таква показна вежба, како од ништо направивме нешто. Очекувам 50-60 вакви возила да бидат подготвени со различно инсталиран волумен на вода до шест кубни метри, шест тона. Очекувам подготвени да ги пречекаме пожарите и мислам дека драматично сме многу поподготвени од претходните години“, рече премиерот Мицкоски одговарајќи на новинарски прашања по посетата на компанијата „Реплек“.

Премиерот извести дека двата авиона за гасење пожари на Дирекцијата за заштита и спасување (ДЗС) се тука, а третиот се чека да пристигне од сервис.

ДЗС денес извести дека го надминале и проблемот со недостаток на пилоти за авионите за гасење пожари со тоа што повторно ги ангажирале двајцата пензионирани пилоти.

Во насока на унапредување на земјоделското производство, Општина Илинден и годинава ја реализираше акцијата за испитување на квалитетот на обработлива почва на територијата на општината. Земени се примероци од вкупно 20 локации, опфаќајќи ги сите населени места во општина Илинден.

„Агрохемиските анализи се извршени во акредитирана лабораторија при Факултетот за земјоделски науки и храна во Скопје. Целта на ова испитување е земјоделците навремено да добијат стручни информации за состојбата на почвата која ја обработуваат, што ќе им овозможи прецизно и рационално ѓубрење на културите, зголемување на приносот, подобрување на квалитетот на земјоделските производи, како и намалување на загадувањето на почвата. Резултатите од анализите се јавно достапни и можат да се прегледаат на официјалната веб-страница на Општина Илинден (ilinden.gov.mk).“соопштија од Општината.

Од таму велат дека овој проект е дел од Стратешкиот план за развој на Општина Илинден 2022–2026 и најавија дека ќе продолжи континуирано да се спроведува, со цел да се опфатат што е можно повеќе земјоделски површини и да се обезбедат подетални податоци за квалитетот на земјиштето на целата територија на општината.

Не сметаме дека еврокомесарката имаше лоша намера, но апелираме да кога се говори за чувствителни прашања и теми кои за жал непотребно се отвораат иако се јасно затворени, треба да се биде внимателен во изјавите, велат од СДСМ, во врска со изјавата на еврокомесарката за проширување, Марта Кос, што ја даде во Скопје.

Кој рече дека идентитетот никогаш не може да стане предмет на политичко одлучување, идентитетот го носиме во нас, во нашите души, во нашите срца, идентитет е како се чувствуваме, како ја чувствуваме нашата татковина.

„Идентитет е како се чувствуваме, како ја чувствуваме нашата татковина. Идентитет е како се грижиме за нашата традиција, на пример манастирите во Северна Македонија, погачата, тавче-гравче, пинџурот или полнетите пиперки“, рече вчера Кос на прес-конференција во Владата.

Бурна реакција во јавноста предизвика изјавата на Кос која во контекст на идентитетот ги посочи традицијата, манастирите, погачата, тавчето гравче, пинџурот, полнетите пиперки, традиционалните носии.

„Очекувавме еврокомесарката Кос да го истакне она што ЕУ самата го има потврдено во сите документи и сите договори, а тоа е дека македонскиот јазик и идентите се целосно признати од Унијата. Ова е неспорен факт, ние како граѓани на Македонија знаеме кои сме, што сме и од каде потекнуваме. Како јазикот, така и идентитетот се јасно потврдени во сите веќе потпишани договори со ЕУ. Не сметаме дека еврокомесарката имаша лоша намера, но апелираме да кога се говори за чуствителни прашања и теми кои за за жал непотребно се отвораат иако се јасно затворени, треба да се биде внимателен во изјавите“, велат од СДСМ.