Фондацијата на СОРОС во Македонија, предводена од поранешниот висок функцинер на СДСМ Владимир Милчин, преку спонзорирање и финансирање проекти, ги корумпира медиумите и тоа го прави селективно.

Ова денеска, на прес конференција го изјави портпаролот на ВМРО-ДПМНЕ Александар Бичиклиски.

Според него, за  секторот медиуми СОРОС Македонија за 2010 г. издвоила повеќе од 150.000 евра, од кои, како што рече, „само за една емисија водителот и националната тв-станица што ја емитува, препознатлива по своето проопозиционо и антивладино делување,  добиваат дури 37.000 евра годишно“.

„Најмалку 310 илјади евра за оваа година им се дадени на пет новинари кои ја формирале Граѓани за европска Македонија ГЕМ која држи трибини низ Македонија и јавно се залага за промена на името на државата. Тоа е организацијата што ја сочинуваат Владимир Милчин, извршен директор на СОРОС, Бранко Геровски главен и одговорен уредник на весникот “Шпиц”, Никола Гелевски, Жарко Трајановски и Роберто Беличанец“, рече Бичиклиски.

Тој праша дали тие пари се пријавени во Управата за јавни приходи и дали Милчин ги дава на сметка или на рака.

Според портпаролот на ВМРО-ДПМНЕ, Фондацијата СОРОС Македонија за годинава потрошила  39.400 евра за обука на новинари, повторно од „медиумите кои се во функција на СДСМ“.

„Очигледно дека СОРОС со овие активности, но и уште многу други познати и непознати за јавноста финансиски трансакции, подгрева антивладина атмосфера и директно ја спроведува агендата и стратегијата на СДСМ, содржана во Надеж. Очигледно аферата Надеж има свој продолжеток, овој пат тоа е новата Фабрика СОРОС“, рече Бичиклиски.

Тој го оцени однесувањето на фондацијата СОРОС како неприфатливо за демократско општество и праша дали  претпоставените на Милчин знаат дека СОРОС Македонија е „крајно исполитизирана и е продолжена рака на политичката партија СДСМ“. /крај/со/фо