Фондацијата Институт отворено општество Македонија (ФИООМ) ниту финансирала, ниту ќе финансира партиски активности. Лагите искажани од министерот за финансии Зоран Ставрески, портпаролот на ВМРО ДПМНЕ Александар Бичиклиски, како и лагите напишани во весникот „Бизнис“, преземени од весникот „Вечер“, се само хајка која би ја нарекол „Излажи и побегни“, рече денеска директорот на ФИООМ, Владимир Милчин.

Милчин додаде дека министерот Ставрески се обидел да подметне дека тие ги поставиле темелите на стратегијата наречена „Надеж“, но неговото недоаѓање на дебата минатиот четврток го покажало спротивното.

„Во јуни 2008 година ГЕМ стана дел од предлог-стратегијата и буџетот на ФИООМ за 2009 и 2010 година, значи неколку месеци пред фамозната стратегија „Надеж“. Не знам дали во стратегијата е посочено дека Бранко Црвенковски треба да користи финансиски средства од СОРОС, но знам дека пари од СОРОС не можел да побара бидејќи ФИООМ не финансира политички активности“, рече Милчин.

Милчин рече дека фондацијата има своја мисија, а тоа е Интеграција на Македонија одвнатре како предуслов за интеграција во ЕУ. Тој додава дека доколку Црвенковски навистина бил советуван да воспостави медиумска алтернатива со помош на СОРОС, како што го обвинува Ставрески, се работело за неинформираност на советниците на министерот бидејќи ФИООМ веќе неколку години не дава грантови на медиуми.

Милчин, портпаролот на ВМРО ДПМНЕ, Александар Бичиклиски го прашува како планира да стигне во Европа бидејќи неговиот напад кон непартиската критичка мисла го игра прилично несмасно. Според Милчин точна била само информацијата на Бичиклиски дека во јавноста излегуваат многу нечисти информации кои се врзуваат за СОРОС, но и дека никој од нив немал земено и едно евро за својата работа, а и не се давале 310.000 евра за петмина новинари.

Жарко Трајаноски од ГЕМ, најави кривични пријави за сите кои тврдат дека иницијаторите на ГЕМ добивале пари од ФИООМ. Трајаноски, Ставрески го нарече кукавица бидејќи не се појавил на дебата, иако бил поканет, а за Бичиклиски рече дека играл улога на обвинител, судија и јавен џелат со своите клевети. Кривични пријави ќе поднесат и за клеветата дека јавно се залагаат за промена на уставното име, бидејќи никогаш не се залагале за промена на името Република Македонија.

„Секогаш настапуваме како Граѓани за Европска Македонија, а не на ФИРОМ. Точно е дека ги критикуваме груевистите за дволичност и лажен патриотизам, бидејќи Груевски се претставува како патриот, а прифаќа да биде именуван како премиер на ФИРОМ. Ова не е разумен компромис ниту во тавтологијата на претседателот Ѓорѓе Иванов“, рече Трајаноски.

Тој го запраша премиерот како прифатил да членува во Европската народна партија како премиер на ФИРОМ и дали клеветничката кампања против ГЕМ е за да се сокријат тајните договори за менување на уставното име, корупциските скандали за проектот „Скопје 2014“, фактот дека петта година по ред не сме членки на НАТО и ЕУ и многу други тајни кои не треба да излезат во јавност. /крај/бс