Анкетната комисија која работи на расчистување на собранискиот инцидент од 1. јули, според најавите на нејзиниот претседател Хајрула Месини ќе ја редуцира листата на лица кои треба да бидат сослушувани, а со работа можно е да заврши до крајот на неделава.

На денешната седница на Анкетната комисија беше анкетиран потпретседателот на Собранието, Рафиз Алити кој рече дека за текот на седницата на 1. јули имал впечаток дека таа се одвива нормално и покрај тоа што забележал нервоза кај пратениците и кај координаторите на пратеничките групи.

„Мојот впечаток беше дека седницата се одвиваше нормално. Имаше одредена доза на нервоза, но сметам дека тоа не беше причина за да се прекине седницата. Додека ја водев седницата разговарав со координаторите на пратеничките групи, но и покрај тоа имаше злоупотреби на процедуралните обраќања.“, рече Алити.

Во однос на обезбедувањето тој посочи дека не бил известен од генералниот секретар на Собранието за некакво зголемување на бројот на лицата кои ја обезбедуваат собраниската зграда.

„Не ми беше кажано од секретарот дека има лица без беџови и дека се побарало дополнително обезбедување, но не забележав ништо невообичаено“, рече потпретседателот на Собранието.

Седницата на Комисијата беше прекината со образложение дека некои од пратениците мора да присуствуваат на други комисиски расправи.

Мисини најави дека е можно продолжение во текот на денешниот ден .

За денеска беше предвидено да се анкетираат и другите двајца потпретседатели на Собранието, Светлана Јакимовска од ВМРО-ДПМНЕ и Јани Макрадули од СДСМ./крај/бд