Македонија
Лека повика на масовен одзив на протестот против Законот за попис

Независниот пратеник Даут Реџепи-Лека, денеска ги повика сите Албанци, невладини организации, опозициските албански партии и членовите и симпатизерите на ДУИ да се придружат на протестот против Предлог законот за попис организиран од страна на Нова демократија.
„Јас ја гледам како многу оправдана опцијата Албанците својот револт, гнев и незадоволство да го изразат преку протестот кој ќе се одржи на 14ти ноември пред Собранието, организиран од Нова демократија. Сметам дека овој протест треба да биде силно поддржан, затоа што тој не е од интерес само на една политичка партија, туку на целиот албански народ во Македонија, а масовноста на овој протест ќе покаже дека Албанците мислат различно од функционерите на ДУИ“, рече Реџепи.
Според него Предлог законот за попис на населението кој е предвидено да се одржи во април наредната година е антиалбански закон и дека тој е производ на договор меѓу коалиционите партнери ВМРО-ДПМНЕ и ДУИ, оставајќи ги надвор од процесот на попишување како што рече стотици илјади Албанци.
„Со овој договор ДУИ и прави уште една услуга на ВМРО-ДПМНЕ и во овој случај оваа услуга е на штета на Албанците, исто како претходно со одобрување на други закони“, додаде Реџепи. /крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пожарот зафати само надворешен дел од дворот на Психијатриската болница Бардовци, нема причина за загриженост, велат од МЗ

По пожарот што вчера зафати дел од тревна површина во дворот на ЈЗУ Психијатриска болница „Скопје“, Министерството за здравство ја информира јавноста дека ситуацијата е целосно ставена под контрола и нема причина за загриженост.
Од безбедносни причини, во краток временски период беше спроведена превентивна евакуација на дел од пациентите и вработените. Навремената и координирана интервенција на надлежните служби спречи проширување на пожарот кон болничките објекти. Не е причинета никаква материјална штета врз објектите и не се регистрирани повредени меѓу пациентите и персоналот.
Пожарот зафати само надворешен дел од дворот, обраснат со сува трева и истиот е успешно локализиран.
Во објектите на болницата има присутен дежурен медицински и административен персонал и активно ќе ја следат состојбата.
Македонија
(Видео) Во седум налети хеликоптерот на МВР исфрли 10 тони вода

Вчера полициски службеници од Хеликоптерската единица за полициски намени при МВР, а по претходно добиено барање од ЦУК за преземање активности во врска со гаснење на пожар во реонот на Блаце, се упатија со хеликоптерот Бел 412 за извршување на задачата.
Во седум налети хеликоптерот исфрли 10 тони вода, а потоа поради ноќните услови се врати во базата, извести МВР.
Македонија
Нормализиран патниот сообраќај до граничниот премин Блаце

Ноќеска е нормализиран патниот сообраќај до граничниот премин Блаце. Укината е забраната и за товарните моторни возила и за автобусите.
Претходно поради настанатиот пожар над магистралниот пат А4 Скопје – Блаце кај тунелот кој се прошири над магистралниот пат, сообраќајот беше пренасочен за патничките возила, а во прекин беше за товарните моторни возила.
МВР воспостави посебен режим на движење на возила од Граничен премин Блаце кон Скопје.
Сообраќајот за патнички моторни возила беше пренасочен кон село горно Блаце по стариот пат кон село Бањани, Глуво и Скопје.
Воспоставен беше посебен режим на движење на возила и во правец од Скопје кон Граничен премин Блаце.
Сообраќајот од Скопје кон граничниот премин беше пренасочен по регионален пат Р 22 39 кон село Бразда, Село Глуво Горно Блаце.