Вицепремиерот за европски прашања Васко Наумовски и претседателот на Државната комисија за спречување на корупција Илми Селами денеска потпишаа Меморандум за соработка меѓу двете институции, особено во делот на изработка на програми за репресија и превенција на корупција и спречување на судир на интереси.

„Овој Меморандум всушност ја одразува поддршката на СЕП, на Министерството за правда, а и целокупната Влада во однос на подготовката на двете нови државни програми кои навистина се значајни стратешки документи за Македонија и нејзиниот систем во борбата против корупцијата за наредниот период од 2011 до 2015 година“, изјави Селами по потпишувањето на Меморандумот.

Тој додаде дека Меморандумот значи поддршка и во имплементацијата на мерките и активностите што ќе бидат предвидени во тие програми и акциските планови.Наумовски посочи дека стратешки приоритет на Владата и натаму останува борбата против корупцијата во сите сфери на општеството, поради што се подготвени да дадат целосна поддршка во изготвувањето на програмите.

„Потпишувањето на Меморандумот за соработка ја потврди поддршката и соработката што ние веќе ја имаме со ДКСК. Тој ќе преставува и основа за поддршката што СЕП ќе ја даде во имплементацијата на активностите за спречување на корупцијата и судирот на интереси. Убеден сум дека со потпишувањето на овој Меморандум нашата заедничка работа ќе продолжи во позитивна насока“, рече вице премиерот задолжен за европски прашања.

Резултатите што ги постигнале државните институции, вклучително и ДКСК, како што рече Наумовски се нотирани и од Транспарентност Македонија, која ја рангирала Македонија на 62 место, намесо досегашното 71 место, како и од страна на ЕК, која го нотира напредокот во борбата против корупцијата во Извештајот за напредкот на Македонија за 2010 година /крај/бд