Браќата Ордан и Љубомир Георгиевски според Јавниот обвинител Ивица Ефремов се сторители на убиство на 74 годишниот Лазо Милошевски од велешкото село Ореше, јави веб порталот Лисица.

Обвинителството денеска побара судот да ги прогласи за виновни и осуди според законот. Поткрепувајќи го своето барање, но и ставот дека браќата се виновни Обвинителството пред Кривичниот судски совет рече дека ако само се анализираат изјавите на сведоците кои давале алиби на обвинетите ќе се увиди нивната контрадикторност што всушност е само еден од показателите дека обвинетите се сторители на убиството. Кон ова ја додаваат и изјавата на заштитениот сведок Бреза.

За одбраната, адвокатите Нојков, Давидовиќ и Витановиќ, секој има право на правично и судење во разумен рок, но обвинетите Ордан и Љубомир тоа го немале.

Одбраната како адут дека браќата се невини ги посочи парафинските ракавици кои се негативни, оружјето од кое е пукано во старецот исто така го нема, а шаржерот што е најден пред да биде сослушан заштитниот сведок, воопшто не се знае на кое оружје му припаѓа, трагите од обувките пронајдени веднаш по настанот не одговараат на обвинетите.

Тие се сомневаат и на веродостојноста на изјавата на заштитниот сведок „Бреза“. Токму поради овие но и други докази одбраната бара ослободителна пресуда.

Судијата Илија Танев во име на петчлениот Кривичен совет пресудата ќе ја соопшти на 17 ноември.

На браќата Љубомир и Ордан Георгиеви по втор пат им се суди за платено убиство за кое како нарачател е осомничен Ѓоре Петревски кој е сеуште во Америка и недостапен за Македонските власти.

Во првиот судски процес велешкиот суд ги прогласи браќата за виновни и осуди на затворска казна во времетраење од 12 години./крај/лисица/фф