Македонија
Албанците протестираа против пописот во април

Најмалку 2.000 Албанци со стотици албански знамиња, знамиња на САД, Европската Унија и НАТО придружени од гласна албанска музика на чело со лидерот на Демокрациа е Ре, Имер Селмани, денеска протестираа пред Собранието во центарот на Скопје.
Со транспарентите „Груевски доста е“, „Албанци – продадено“ и „ДУИ и ВМРО се вљубени“ под мотото „Не се попишуваш, не постоиш“, насобраните демонстранти го изразија своето незадоволство од коалицијата на власт и бараа пописот на населението кој е закажан во април, да се одржи во јули и да трае еден месец .
Меѓу транспарентите беше забележлив и еден со зборовите „Стоп за национализмот“, но не се забележа македонското знаме.
Протестот беше под големо полициско обезбедување, но помина мирно и без инциденти. Колона од демонстранти со огромен аплауз ги пречека лидерот на Демокрациа е Ре, Имер Селмани, како и останатите високи функционери на неговата партија.
„Со овој масовен протест одлучени сме да го спречиме донесувањето на Законот кој брише над 30 отсто од албанското население во Македонија,“ рече Имер Селмани и додаде дека неговата партија има единствена цел – „да го спречи дискриминаторскиот и антиалбански закон кој го предлага Владата на ВМРО и ДУИ“.
Тој истакна дека пописот не треба да се одржи во април, туку во јули и дека наместо 15 дена, треба да трае еден месец, и истиот да ја опфати и албанската дијаспора.
„Бидете само еднаш мажи и не гласајте како што ви наредиле Никола Груевски и Али Ахмети. Гласајте како што бара албанскиот народ, електоратот кој ве гласал да бидете пратеници,“ им порача Селмани на пратениците на ДУИ.
Лидерот на Демокрациа е Ре на крајот ја поздрави подршката на протестот од Албанците во Америка, Западна Европа како и од другите страни на светот./крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре сончево време со температура до 30 степени

Времето утре наутро ќе биде ведро и посвежо, преку денот сончево. Ќе дува слаб до умерен, наместа долж Повардарието повремено засилен северен ветер, информира УХМР.
Минималната температура ќе биде во интервал од 4 до 15, а максималната ќе достигне од 23 до 30 степени.
Во Скопје, сончево, со слаб до умерен, а во делови од котлината повремено засилен ветер од северен правец. Минималната температура ќе се спушти до 10, а максималната ќе достигне до 30 степенiи.
Продолжува периодот на претежно сончево време со посвежи утра и постепен пораст на дневната температура.
Македонија
Почна реконструкцијата и изградбата на шест спортски терени во Гостивар

Општина Гостивар започна со реконструкција и изградба на 6 спортски терени, од кои 4 се спортски терени, еден парк со спортски терен и едно спортско игралиште, на различни населени места во градот.
Од нив, 3 постоечки терени ќе бидат реновирани и опремени со модерна опрема и тартан подлога, додека 3 нови терени ќе се изградат од почеток, според најсовремените стандарди за безбедност, квалитет и функционалност.
„Нашата цел е јасна: да создадеме простори каде што младите ќе поминуваат квалитетно време, ќе се занимаваат со спорт и ќе растат здрави. Овие инвестиции се инвестиции за иднината на нашите генерации,“ – истакна градоначалникот на Општина Гостивар, Валбон Лимани.
Македонија
Злоупотреби со регистрација на половни возила: 11 осомничени, меѓу нив и вработена во МВР

Секторот за внатрешни работи Куманово, во соработка со Одделот за внатрешна контрола и криминалистички истраги при МВР, поднесе кривични пријави против 11 лица поради повеќе кривични дела поврзани со плаќање давачки за увоз и регистрација на половни моторни возила.
Меѓу пријавените е и 43-годишна вработена во МВР – Одделение за управни работи Куманово, осомничена за „злоупотреба на службена положба и овластување“. Пријавен е и 29-годишен контролор во станица за технички прегледи поради „фалсификување исправа“ и „употреба на исправа со невистинита содржина“. Останатите лица се сомничат за „прикривање на стоки кои се предмет на криумчарење и царинска измама“ и „давање лажен исказ“.
Според МВР, во текот на 2024 година дел од пријавените договарале сопственици на возила со странски таблици, кои за половина од законските давачки за увоз, добивале регистрација без да ги платат потребните трошоци. Во електронскиот систем биле внесувани податоци за возила без платени царини, такси и надоместоци за регистрација.
Пријавениот контролор во станица за технички прегледи изготвувал и фалсификувани електронски табели налик на оние што ги издава Бирото за метрологија за хомологација на возила.
Од МВР информираат дека се преземаат мерки за понатамошно расчистување на случајот.